Լավագույն էրոտիկ կինոների թեժ 10-նյակ (լուսանկարներ)

Hakhunts.wordpress.com-ը գրում է.

Բոլորն էլ սիրում են բաց տեսարաններով կինոնկարներ: Սակայն կան այնպիսի ֆիլմեր, որոնք հիրավի ցուցադրում և բացահայտում են իսկական կիրքը, սերը, զգացմունքը, հույզերի տեղատարափը: Հենց այդպիտի ֆիլմերի մասին էլ կխոսենք այսօր: Տասնյակը կազմվել է իմ անձական նախասիրությունները հաշվի առնելով, կարող է չհամընկնել Ձեր կարծիքի հետ: Իսկ բոլոր համընկնումները պատահական են հիրավի:

10-րդ հորիզոնական

Malèna (2000)

Նա հրաշք է, գեղեցիկ…Աստվածուհի: Նա բոլոր տղամարդկանց ցանկության և չիրականացած ֆանտազիաների հերոսուհին է: Նրա գեղեցկությունից տղամարդիկ խելքները թռցնում են, իսկ կանայք գժվում ու խելագարվում: Իսկ նրան շրջապատողները հիմար են, դատարկ, սին և նախանձ: Իսկ Մալենայի կյանքը դաժան է: Նրան ոչ ոք չի օգնում ամուսնու անհետանալուց հետո: Այս ֆիլմն ապացուցում է, որ գեղեցկությունը և պարգև է, և խարան: Անկրկնելի Մոնիկա Բելլուչին փայլում է իր կանացի հմայքով և դերասանական խաղով:

9-րդ հորիզոնական

Wild Orchid (1989)

Ֆիլմի սյուժեն բավականին պարզ է: Գեղեցիկ, երիտասարդ ամերիկուհին ժամանում է արևի ճառագայթներով ողողված Բրազիլիա գործի բերումով: Բայց արի ու տես, այստեղ նա հանդիպում է նոր հույզեր, զգացմունքներ և հուզմունքներ: Բրազիլական կառնավալ, գեղեցիկ դիմակահանդես, պճնագեղ զգեստներ և բրազիլական ջազ…այս ամենը համեմված դերասանական անկրկնելի խաղով ստեղծում են մի հիանալի մթնոլորտ, որի մեջ ցանկանում ես ընկղմվել և մոռացության մատնվել: Կիրքը կարող է ապրել առանց սիրո, սերը կարող է ապրել առանց կրքի: Սակայն այս ֆիլմում դրանք երկուսն էլ միախառնվում են Բրազիլական ռիթմերի ներքո:

8-րդ հորիզոնական

Eyes Wide Shut (1999)

Գեղեցիկ ամերիկացի զույգ: Նրան ունեն երեխա, ամուսինը բարձր վարձատրվող բժիշկ է: Առաջին հայացքին ամեն ինչ հարթ է և երջանիկ: Սակայն կանայք երկար ժամանակ հանգիստ և անհոգ կյանքով ապրել չեն սիրում: Նրանց անպայման պետք են ինտրիգներ, խաղեր, խանդ և այլն: Նրանք երկուսով օփիոն են ծխում և կինը հայտնում է, որ մի անգամ տեսնելով խիզախ և առնական նավաստուն մտքում բազմիցս դավաճանել է ամուսնուն…Հենց այդ պահից էլ սկսվում են ամուսնու գիշերային անհավանական արկածները: Ֆիլմը մի տեսակ մութ և խորհրդավոր է: Հրաշալի և անհասկանալի միևնույն ժամանակ:
Հավելեմ նաև, Նիքոլ Քիդմանը և Թոմ Կռուզը կինոյի նկարահանումներից հետո անհասկանալի պատառներով բաժանվել են, իսկ Սթենլի Քուբրիկը մահացել է:

7-րդ հորիզոնական

The Blue Lagoon (1980)

Նավաբեկությունից փրկված երկու մանկահասակ երեխա հայտնվում են անմարդաբնակ կղզում: Այդ երկու արական և իգական սեռի Ռոբինզոնները հաստատվում են կղզում, կառուցում իրենց կացարանը, միասին հասունանում և բախվում հասունացման խնդիրների հետ: Ֆիլմն ուղղակի ընկղմում է դիտողին արևադարձային կլիմայով լեցուն կղզի, կապույտ մաքրամաքուր ծովի և մանկական անմեղ ժպիտի մեջ: Ամեն անգամ նայելիս պատկերացնում ես քեզ ու քո երկրորդ կեսին այդ կղզու վրա: Մարդկությունից, համացանցից, ՎայՖայից, Ինստայից այն կողմ..Ծով, կոկոս և սիրահար զույգ: Դասական, անկրկնելի ռոմանտիկա:

6-րդ հորիզոնական

Il portiere di notte (1973)

Երևէ լսել եք Ստոքհոլմյան Համախտանիշի մասին? Այս կինոնկարը նայելուց հետո անպայման նայեք ՎիկիպեՁիկում դրա նշանակության մասին: Դահիճի և զոհի սիրո մասին պատմություն…Սերը կարող է այցելել ամենաանհավանական վայրերում, նույնիսկ Նացիստական գաղութում: Բարդ հարաբերություններ և ապրումներ: Սկանդալային և միևնույն ժամանակ հուզախառն տեսարաններով կինոնկար: Խոսքերն ավելորդ են: Ուղղակի դիտեք:

5-րդ հորիզոնական

No mires para abajo (2008)

Երբ հասարակությունը կարծում է, թե կյանքն իմաստ չունի, մենք պետք է ամեն ինչին նայենք Էրոսի աչքերով: Կգա ժամանակ, և Էրոսը կկանգնեցի կյանքի և մահվան միջև ընթացող մենամարտը, որտեղ այսքան ժամանակ հաղթում է Մահը:

Էլոյը զբոսնում է երազի մեջ… Նա չի կարողանում հաշտվել հոր վաղաժամ մահվան հետ և տառապում է լուսնոտությամբ: Մի գիշեր նա բառիս բուն իմաստով ընկնում է Էլվիրայի մահճակալի մեջ վերևից և հայտնվում Դրախտում: Փորձառու աղջիկը սովորեցնում է անփորձ Էլոյին մարմնական սիրո բոլոր գաղտնիքներին: Սիրով զբաղվելը դառնում է նրանց համար կյանք, հոգեբանություն, հարմոնիա, փիլիսոփայություն:

4-րդ հորիզոնական

The Libertine (2004)

Ջոնի Դեպին բոլորս գիտենք Կապիտան Ջեք Ճնճղուկի դերով, իսկ ինձ համար նրա լավագույն դերն ու տաղանդի մեծագույն արտահայտումը հենց այս ֆիլմում է:
Հագեցած և ծանր կինոնկար: Դժվար է լինել բոլորից տարբերվող մի անհատ, ով տարբերվում է գորշ մասսայից: Այլախոհ հարբեցողի շուրթերով խոսում է ճշմարտությունը՝ զզվելի, կեղտոտ, զազրոտ և մերկ: Հերոսը ֆիլմի սկզբից մինչև վերջին րոպեն կանթեղի նման այրվում է, տալիս լույս, լուսավորություն և լոգոս-միտք կողքիններին: Ուշադրություն դարձրեք ֆիլմի սկզբում հերոսի մենախոսությանը: Համլետի մենախոսությունը մանկական լացի է նմանվում նայելուց հետո:

3-րդ հորիզոնական

The Dreamers (2003)

Գրգռիչ, սահմռկեցուցիչ և միևնույն ժամանակ սկանդալային: Դերասական խաղի մասին բառերն ավելորդ են: Այս ֆիլմի դիտումից հետո շատերի համար Էվա Գրինը կդառնա կանացիության, հմայքի և գեղեցկության չափանիշ: Այս կինոնկարում շատ են շոկային տեսարանները: Կարծես երկու աշխարհները՝ հին և նորը, Իզաբելի և Մեթյուի ներքո բախվում են միմյանց հետ և սիրով զբաղվում, մի ինչ որ նոր, անբացատրելի և անմեկնելի էություն սկզբնավորելու համար: Իսկ Վեներայի տեսարանը…Բան չունեմ այլևս ավելացնելու: Դիտեք և վայելեք:

2-րդ հորիզոնական

Nine 1/2 Weeks (1985)

Լսել եք երևէ երջանկահիշատակ Ջո Քոքերի “You can leave your hat on” երգը? Ոչ, ապա այս կինոնկարը Ձեզ համար չէ միանշանակ: Այս ֆիլմն ինձ մոտ ասոցացվում է էրոտիկ բառի հետ ուղիղ, ոչ փոխաբերական կապով: Գլխավոր հերոսին մարմնավորել է անկրկնելի Միքի Ռուրկը, ով առաջին իսկ վայրկայնից հասկացրեց, որ հեշտ չի լինելու իր հետ: Նա օժտված է ինչ-որ թաքնված, վտանգավոր ձգողությամբ: Իսկ հերոսուհին՝ Քիմ Բեսինգերը գերում է իր անկեղծ պարով առանց խոսքերի: Կինոնկարը բոլորի համար չէ միանշանակ: Շատերին դուր չի գա, մեծամասնությունն այն անիմաստ կհամարի: Բայց նայել արժէ միանշանակ:

1-ին հորիզոնական

Ultimo tango a Parigi (1972)

Այս ֆիլմի մասին ոչինչ չեմ պատմի: Այն հանգամանքը, որ այն հաղթող է ճանաչվել իմ տասնյակում արդեն իսկ ամեն ինչի մասին ասում է: Միայն կասեմ որ այս ֆիլմի և 3-րդ հորիզոնականում տեղ գտած ֆիլմի ռեժիսորը միևնույն մարդն է, մաէստրո Բերտոլուչչին:

Հ.Գ. Իսկ թե ինչու այս տասնյակում տեղ չի գտել մեծ աղմուկ բարձրացրած «Գրեյի 50 երանգները», ապա կարդացեք այստեղ: