10 հայտնիներ, ովքեր ավելի գեղեցիկ են հիմա, քան երբ ավելի երիտասարդ էին

Այս անգամ էլ որոշեցի կազմել հայ կին աստղերի տասնյակ, ովքեր տարիների ընթացքում միայն ավելի են գեղեցկացել։ Ոմանց պարագայում դա ստացվել է պարզապես ինքնստինքյան, ոմանց պարագայում՝ ոճային փոփոխությունների արդյունքում, իսկ ոմանց պարագայում էլ՝ պլաստիկ միջամտության շնորհիվ։ Այս տասնյակում միջոցները էական չեն, էականը արդյունքն է; Եվ այսպես, Ձեզ եմ ներկայացնում 10 աստղերի, ովքեր ակնառու արտաքնային փոփոխություններ են կրել տարիների ընթացքում և ներկայումս ավելի գեղեցիկ են, քան ավելի երիտասարդ տարիներին։

10․ Նելլի

Թող ինձ ների Նոր հայեր խմբի նախկին անդամ Նելլին, բայց նա դասական օրինակ է նրա, որ պլաստիկ վիրահատությունները երբեմն հրաշքներ են գործում։ Եթե երիտասարդ տարիքում ու իր կարիերայի պիկին Նելլին կարող էր չադրայով երգել, ապա հիմա նա շատ հաճելի արտաքնով ու դիմագծերով կին է դարձել, ով առանց ամաչելու կարող է դուրս գալ բեմ ու ցանկացած այլ միջավայր։ Հիմա նա գեղեցկուհի է։

9․ Սիրուշո

Սիրուշոյի պարագայում հարկ է նշել, որ նա երբեք էլ տգեղղ չի եղել, պարզապես շոու բիզնես նա մուտք գործեց դեռ դեռահաս լինելով ու նրա արտաքնային բնական տրանսֆորմացիայի ողջ ցիկլն անցավ մեր աչքի առաջ։ Տարիների ընթացքում, նրա արտաքինն ավելի կանացիացավ, անհրաթություններն ու դեռահասական կլորիկությունն անհետացան և սիրուշոն այժմ շատ գեղեցիկ ու համաչափ դիմագծերով և կառուցվածքով կին է։

8․ Լիլու

Դժվար է հստակ նշել, թե կոնկրետ ինչի հաշվին է Լիլուն հասել այս արդյունքին, բայց մի բան ակնհայտ է․ նրա արտաքինը հիմա շատ ավելի նուրբ ու գրավիչ է, քան ավելի երիտասարդ տարիքում։ Գուցե Լիլուն պատկանում է կանանց այն տեսակին, ովքեր ասես կոնյակը՝ ժամանակի հետ միայն ավելի են լավանում։

7․ Իվետա Մուկուչյան

Իրական կյանքում Իվետային տեսած ցանկացած ոք կփաստի, որ նա շատ ավելի նուրբ ու գեղեցիկ է, քան մենք սովոր ենք տեսնել նրան էկրաններից ու ամսագրերի լուսանկարներից։ Հավանաբար, Իվետան պարզապես ֆոտոգենիկության խնդիր ունի ու տարիների ընթացքում ոչ թե նրա արտաքինն է շեշտակի փոխվել՝ որպես այդպիսին, այլ նա սովորել է ավելի ճիշտ աշխատել տեսա ու ֆոտոխցիկների առջև՝ ավելի շահեկան լույսի ներքո ցուցադրելով իր արտաքինը։ Արդյունքը կարծում եմ ակնհայտ է։

6․ Շուշաննա Թովմասյան

Շուշաննայի պարագայում գործ ունենք մոտավորապես նույն երևույթի հետ, ինչ Սիրուշոյի պարագայում էր․ նա հայտնի դարձավ շատ երիտասարդ տարիքում, երբ նրա արտաքինը դեռ վերջնականապես չէր ձևավորվել։ Բացի դրանից, նրա գեղեցկությանն ամենևիբն չէր նպաստում իր դերը, որտեղ նա մշտապես լացում էր, տխուր էր ու նույնիսկ ուներ շատ տգեղ մականուն՝ Անլվա․․․ Սակայն սերիալը վերջացավ, տարիները անցան ու Շուշաննան մեծացավ և այժմ մեր առջև կանգնում է, որպես նուրբ ու գեղեցիկ օրիորդ, ով ասես ստեղծված լինի՝ դիսնեյան ինչ որ արքայադստեր կերպար մարմնավորելու համար։

5․ Սոֆի Մխեյան

Սոֆի Մխեյանը տարիներ առաջ շատ անհասկանալի իմիջային դեգերումների մեջ էր, հետո ինչ որ մի պահ էլ ավելորդ քաշի խնդիր ուներ, բայց ինչ որ մի պահից սկսած նա սկսեց լրջորեն զբաղվել իրենով ու իր իմիջով և արդյունքում, մի քանի տարի անց նա շատ ավելի կանացի ու նրբագեղ կերպարով է ներկայանում մեզ։

4․ Լիլիթ Հովհաննիսյան

Շատերը մատնանշում են այն հանգամանքի վրա, որ Լիլիթ Հովհաննիսյանը մեր շոու բիզնեսում պլաստիկ վիրահատությունների ամենաշատ ենթարկված աստղն է, սակայն ի՞նչ էական է տա, գրողը տանի։ Չէ՞ որ անկախ նրանից, թե ինչ վիրահատություններ է արել Լիլիթը, ակնհայտ է, որ արդյունքը առավել քան հաջողված է և Լիլիթ Հովհաննիսյանը տարիների ընթացքում դարձել է մեր էստրադայի ամենացանկալի ու գեղեցիկ ներկայացուցիչները։ Նպատակն արդարացնում է միջոցները։

3․ Էմմի

Էմմին՝ 10 տարի առաջ և Էմմին՝ հիմա, դա սարերի ու ձորերի տարբերություն է, ինչը կարող եք տեսնել նաև լուսանկարում։ Էմմին ևս դիմել է պլաստիկ վիրաբուժության կախարդական փայտիկին ու բարեբախտաբար, արդյունքները միանգամայն գոհացուցիչ են ստացվել։ Հիմա Էմմին կարող է պարծենալ նրանով, որ ինքը՝ լինելով գրեթե 30 տարեկան, շատ ավելի գրավիչ ու հաճելի տեսք ունի, քան 20 տարեկանում։

2․ Նազենի Հովհաննիսյան

Նազենի Հովհաննիսյանին կարելի է գովել, գովել, գովել ու էլի գովել։ Այս կինը երբեք չի դադարում ինքնազրագացման ու ինքնակատարելագործման տքնաջան աշխատանքը և արդյունքում, տարիների ընթացքում միայն բարելավում է իր բոլոր առավելությունները և հղկում թերությունները։ Սա նույնքան ճիշտ է նրա արտաքին տեսքի մասով, որքան ճիշտ է պրոֆեսիոնալիզմի ու անհատականության։ Դրա համար էլ զարմանալի ոչինչ չկա, որ Նազենին տարեց տարի ավելի է գեղեցիկ ու գրավիչ է դառնում։ Կարծում եմ, որ Նազենիի պարագայում կարելի է վստահ լինել, որ նա չի դադարելու հիացնել ու էտալոն լինել այդ թվում նաև գեղեցկության ոչ 2, ոչ 10, ոչ էլ 20 տարի անց։

1․ Լուիզա Ներսիսյան

Լուիզան բացառիկ կին է ու միայն գլուխ կարելի է խոնարհել նրա տաղանդների և ինքնակատարելագործման հաջողված փորձի առջև։ Լուիզային ես հիշում եմ դեռ մի 10-15 տարի առաջ հեռարձակվող թաքնված տեսախցիկի շոուից, որը պահմտոցի էր կոչվում։ Դա այնքան վաղուց էր, որ այսօր այդպես էլ չկարողացահամացանցում գտնել կադրեր դրանից, բայց ով տեսել է Լուիզային այն ժամանակ ու ով համեմատում է նրան այսօրվա Լուիզայի հետ, կարող է ասել, որ մեր առջև ասես Անդերսենի անճոռնի ճուտիկի հեքիաթի իրական տարբերակը լինի։ Ու այսօր իրոք դժվար է պատկերացնել, որ մեր բեմի ամենագեղեցիկ ու գրավիչ կանանցից մեկը, ժամանակին այն տգեղ աղջիկներ, ով մարդկանց գլուխներին օյիններ էր խաղում՝ թաքնված տեսախցիկների օբյեկտիվ առջև:

Աղբյուրը՝ asekose.am