Չինաստանի բանկերը սառեցրել են հյուսիսկորեացիների հաշիվները

Չինաստանի միանգամից մի քանի բանկեր, ներառյալ երկրի խոշորագույն Չինաստանի առեւտրա-արդյունաբերական բանկը (ICBC), սառեցրել են հյուսիսկորեացիներին պատկանող հաշիվները: Այդ մասին, փետրվարի 22-ին հաղորդել Է Reuters գործակալությունը:

Ինչպես նշում Է Rambler News Service-ը, ICBC-ի գրասենյակի աշխատակիցներից մեկը Դայնդուն քաղաքում Dong-A Ilbo հարավկորեական թերթի ներկայացուցիչների հետ կայացած հեռախոսազրույցի ժամանակ պատմել Է, որ բոլոր հաշիվների գծով գործառնությունները, ներառյալ արժութային փոխանցումները, կասեցվել են 2015 թվականի դեկտեմբերին: 

«Մեզ ստույգ չեն ասել այդ միջոցառումների պատճառների մասին, բայց ինձ թվում Է՝ դրանք կապված են Հյուսիսային Կորեայի եւ Չինաստանի փոխհարաբերություններում առկա լարվածության հետ»,- հայտնել Է թերթի աղբյուրը:

Ինչպես, այսօր հայտնել Է ՏԱՍՍ-ը, ՉԺՀ-ի ԱԳ նախարարության պաշտոնական ներկայացուցիչ Խուա Չունյինը հայտարարել Է, որ Չինաստանի ԱԳ նախարար Վան Ին փետրվարի 23-ին այցով կժամանի ԱՄՆ եւ այդ երկրի պետքարտուղար Ջոնի Քերիի հետ կքննարկի երկկողմ հարաբերությունները եւ միջազգային խնդիրները, այդ թվում՝ ԿԺԴՀ-ի միջուկային ծրագիրը եւ Կորեական թերակղզու իրադրությունը:

«ԱՄՆ-ի պետքարտուղար Ջոն Քերիի հրավերով՝ ՉԺՀ-ի ԱԳՆ-ի ղեկավար Վան Ին փետրվարի 23-ից մինչեւ 25-ը այցով կգտնվի ԱՄՆ-ում: Կողմերը կքննարկեն երկկողմ հարաբերությունների հարցերը եւ կարծիքներ կփոխանակեն միջազգային ու տարածաշրջանային այլ հարցերի շուրջ»,-նշել Է դիվանագետը:

«Մենք սերտ շփումներ ենք պահպանում կորեական միջուկային խնդրի շուրջ: Մենք հուսով ենք, որ Վան Ին այցի ընթացքում ամերիկյան կողմի հետ կարծիքների հանգամանալի փոխանակում կանցկացնի այդ հարցի շուրջ»,-հավելել Է դիվանագետը: