Մեկ շաբաթվա մեջ երկրորդ անգամ. Մուսիալան խաղադաշտում կրկին կորցրել է գիտակցությունը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մյունխենի «Բավարիայի» և Գերմանիայի ազգային հավաքականի կիսապաշտպան Ջամալ Մուսիալան կրկին անհանգստացրել է ֆուտբոլային հանրությանը։ 23-ամյա ֆուտբոլիստը մեկ շաբաթվա ընթացքում արդեն երկրորդ անգամ է գիտակցությունը կորցնում խաղադաշտում։

Միջադեպը տեղի է ունեցել այսօր՝ օգոստոսի 18-ին, «Հայդենհայմի» դեմ կայացած ընկերական հանդիպման ժամանակ (մյունխենցիները հաղթել են 4-2 հաշվով)։ Մուսիալան փոխարինման է դուրս եկել 61-րդ րոպեին՝ փոխարինելով Իսմայել Սաիբարիին։ Սակայն ընդամենը վեց րոպե անց նա խաղադաշտի կենտրոնում վայր է ընկել։ Երկու թիմերի ֆուտբոլիստներն անմիջապես շրջապատել են նրան, իսկ բժիշկները շտապել են օգնության։ Բարեբախտաբար, բժշկական անձնակազմի կարճատև միջամտությունից հետո ֆուտբոլիստը գիտակցության է եկել և ակումբի աշխատակցի աջակցությամբ լքել խաղադաշտը։

Նմանատիպ դեպք գրանցվել էր նաև ընդամենը երեք օր առաջ՝ օգոստոսի 15-ին, «Լայպցիգի» դեմ կայացած ընկերական հանդիպման (3-1) ժամանակ։ Այդ խաղում Մուսիալան 83-րդ րոպեին գոլի հեղինակ դառնալուց հետո կորցրել էր գիտակցությունը։ Այն ժամանակ որպես պատճառ նշվում էր ուժեղ շոգը, քանի որ Մյունխենում օդի ջերմաստիճանը գերազանցում էր 30 աստիճանը։ Այս նոր միջադեպի հանգամանքներն ու պատճառները դեռևս չեն հստակեցվում:

Թեև նախորդ դեպքից հետո «Բավարիայի» մարզական տնօրեն Մաքս Էբերլը հայտարարել էր, որ Մուսիալան իրեն լավ է զգում, սակայն կրկնվող դրվագը լուրջ անհանգստության տեղիք է տալիս։ Ակնկալվում է, որ մյունխենյան ակումբը լրացուցիչ տեղեկատվություն կտրամադրի ֆուտբոլիստի առողջական վիճակի վերաբերյալ։

Հիշեցնենք, որ 23-ամյա Մուսիալան «Բավարիայի» գույները պաշտպանում է 2020 թվականից։ Ակումբի կազմում նա դարձել է Գերմանիայի վեցակի չեմպիոն, երկրի գավաթակիր, ՈւԵՖԱ-ի Սուպերգավաթակիր և աշխարհի ակումբային առաջնության հաղթող։

Հետևեք մեզ՝ այստեղ