Պետության իրական դերը հյուրանոց կառուցելը չէ, այլ անվտանգ ու շահութաբեր միջավայր ստեղծելն է. Հրայր Կամենդատյան

Տավուշյան օրեր։ Հարգելի՛ հայրենակիցներ,

Այսօր գտնվում ենք Տավուշի Բերդ տարածաշրջանում՝ մի վայրում, որն ունի հսկայական բնական ու պատմական ներուժ, սակայն զբոսաշրջային ենթակառուցվածքների տեսանկյունից մատնված է ամբողջական անտեսման։ Սա միայն տնտեսական բացթողում չէ, սա առաջին հերթին անվտանգային և պետական մտածողության բացակայության հարց է։

Անհնար է զարգացնել սահմանամերձ շրջանը, երբ այստեղ չկան խոշոր հյուրանոցներ, պատշաճ սննդի կենտրոններ և տուրիստական բազային հարմարություններ։ Սակայն սխալ է սպասել, որ պետությունը պետք է ինքը դառնա հյուրանոցատեր կամ ռեստորատոր։ Պետությունը վատ մենեջեր է բիզնեսում, և պետական բյուջեով շինարարությունն ու հետագա մասնավորեցումը տանելու են միայն անարդյունավետության, փոքր բիզնեսի սպանման և ռեսուրսների մսխման։

Պետության իրական դերը հյուրանոց կառուցելը չէ, այլ անվտանգ ու շահութաբեր միջավայր ստեղծելն է։

Ինչո՞ւ մասնավոր ներդրողը չի գալիս Բերդ։ Որովհետև պետությունը չի ապահովել անհրաժեշտ հաղորդակցուղիները, չկան անխափան ենթակառուցվածքներ և չկա սահմանամերձ գոտու համար նախատեսված հատուկ, արտոնյալ հարկային ռեժիմ։

Եթե ուզում ենք Բերդը տեսնել զարգացած ու շեն, պետությունը պետք է անհապաղ.

* Ապահովի որակյալ ճանապարհներ, ջուր, էլեկտրաէներգիա և կապ։

* Սահմանի զրոյական հարկային արտոնություններ և սուբսիդավորվող վարկեր խոշոր ներդրողների համար։

* Ներդնի «Պետություն-մասնավոր» գործընկերության մոդելը՝ տրամադրելով հողն ու ենթակառուցվածքը, որպեսզի մասնավորը կառուցի ու կառավարի։

Թույլ չտանք, որ սահմանամերձ Բերդը մնա աշխարհից կտրված։ Պետությունը պետք է կատարի իր տնային աշխատանքը, որպեսզի մասնավոր капиталը մուտք գործի այստեղ և ապահովի տարածաշրջանի թռիչքաձև զարգացումը։