Թեմուրի հարազատները կարծում են՝ նա ընդունակ չէր սպանություն կատարելու

News.am-ը գրում է .

Զինծառայող Թեմուր Սլոյանի հարազատները կարծում են՝ նա ընդունակ չէր սպանելու կրտսեր սերժանտին, ապա ինքնասպան լինել: Թեմուրի ազգականներից Իշխան Նամոյանը NEWS.am-ի հետ զրույցում ասաց, որ Թեմուրը դեպքից մեկ օր առաջ է խոսել մոր հետ, ոչնչից չի բողոքել:

«Խոսել են, ասել է՝ ամեն ինչ նորմալ է: Չնայած ինքը գաղտնապահ երեխա էր, ինչ լիներ-չլիներ, չէր ասի»,- ասաց նրա ազգականը:

Ազգականի խոսքով՝ կատարվածն անհասկանալի է իրենց համար, հույս ունեն, որ քննությունը կտա բոլոր հարցերի պատասխանները:

Նշենք, որ ըստ ՔԿ տարածած հաղորդագրության, նախնական տվյալներով՝ 2016 թ. փետրվարի 19-ին՝ ժամը 06:50-ի սահմանում, N զորամասի 3-րդ ջոկի գնդացրորդ, շարքային Թեմուր Սլոյանը, նույն զորամասի պահպանության տակ գտնվող մարտական դիրքի դիտակետի մոտ իրեն ամրակցված գնդացրից կրակել է նույն ջոկի հրամանատար, մարտական դիրքի ավագ, կրտսեր սերժանտ Կամո Հովհաննիսյանի դեմքի շրջանին։ Ստացած վնասվածքից նա տեղում մահացել է, որից հետո շարքային Սլոյանը ինքն իրեն գլխի շրջանում պատճառել է հրազենային մահացու վիրավորում:

Հարուցվել է քրեական գործ ՔՕ 104-րդ հոդվածի 1-ին մասով եւ 110-րդ հոդվածի 1-ին մասով:

Ավելի վաղ ԼՂՀ ՊԲ մամուլի ծառայությունը հայտնել էր, որ 2016թ. փետրվարի 19-ին` ժամը 07:00-ի սահմանում, ՊԲ հարավարեւելյան ուղղությամբ տեղակայված զորամասերից մեկի պահպանության տեղամասում տեղի ունեցած արտակարգ պատահարի հետեւանքով հրազենային մահացու վիրավորում են ստացել ՊԲ զինծառայողներ, 1997թ. ծնված Կամո Արայի Հովհաննիսյանը եւ Թեմուր Շարիի Սլոյանը: