Մինչև վերջին պահը գոռում էր՝ «Օգնե՛ք»․ սպանված մոդելի վերջին ճիչն ու չիրականացած երազանքը

Մոսկվայի մարզի Ռոմաշկովո գյուղի հարակից անտառում հայտնաբերվել է 39-ամյա Նատալյա Բ.-ի մարմինը, որը հուլիսի կեսերից համարվում էր անհետ կորած։ Գործի շրջանակում իրավապահները հետաքրքրված են նրա մտերիմ տղամարդու գտնվելու վայրով։

Պատմությունը սկսվել է այն բանից հետո, երբ բնակիչները Մալևիչի այգու հարակից տարածքում նկատել էին մոլորված շան, որը երկար ժամանակ չէր հեռանում շրջակայքից։ Կենդանուն բռնել էին և ժամանակավոր խնամքի հանձնել։ Մի քանի օր անց մի կին հայտնել էր, որ շունը, ամենայն հավանականությամբ, պատկանում է իր անհետ կորած դստերը՝ Նատալյային։

Դրանից հետո սկսվել էին ակտիվ որոնողական աշխատանքներ։ Կամավորներն ու բնակիչները տարածել էին կնոջ լուսանկարները, որոնել էին շրջակա տարածքներում, իսկ ընտանիքը դիմել էր ոստիկանություն։ Ավելի ուշ Նատալյայի մարմինը հայտնաբերվել է բնակելի համալիրի հարակից անտառային գոտում։

Լրատվամիջոցների տվյալներով՝ կնոջ մտերիմ տղամարդը, որի հետ նա հարաբերությունների մեջ էր, հայտնվել է քննության ուշադրության կենտրոնում։ Հրապարակված տեսախցիկների կադրերում երևում է, թե ինչպես է նա կնոջ անհետացումից հետո բնակարանից ծանր պայուսակներ դուրս բերում և տեղափոխում ավտոմեքենա։ Այս տեղեկությունները պաշտոնապես չեն մեկնաբանվել, իսկ դրանց նշանակությունը պետք է պարզի քննությունը։

Հաղորդվում է նաև, որ տղամարդը ներկայումս Ռուսաստանում չէ։ Ըստ լրատվամիջոցների՝ նա հետախուզվում է, իսկ իրավապահները շարունակում են քննությունը՝ պարզելու կնոջ մահվան բոլոր հանգամանքները։

Միևնույն ժամանակ, Նատալյայի շունը, որը դարձել էր այս պատմության կարևոր հանգամանքներից մեկը, այժմ գտնվում է կամավորների խնամքի տակ։ Ըստ չհաստատված տեղեկությունների՝ հետագայում այն կարող է փոխանցվել զոհի մորը։