Ռուս երեխաները վտանգավոր վիրուսով են վարակվել Թուրքիայի հինգաստղանի հյուրանոցում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Թուրքիայի Բելեկ հանգստավայրում գտնվող հինգաստղանի IC Santai Family Resort հյուրանոցում հանգստացող ռուսաստանցի ընտանիքի երեխաները, ըստ Baza-ի, վարակվել են Կոքսակի վիրուսով, ինչի հետևանքով նրանց երկար սպասված արձակուրդը վերածվել է լուրջ փորձության։

Ընտանիքի մայրը՝ Աննան, պատմել է, որ երեխաների հետ հանգստի համար երկար ժամանակ գումար էր կուտակել։ Նրա խոսքով՝ շուրջ 510 հազար ռուբլի արժողությամբ տուրփաթեթը ներառում էր ավիատոմսերը, ապահովագրությունը, տրանսֆերը և հյուրանոցում կեցությունը։

Սակայն հանգստի մեկնարկից ընդամենը չորս օր անց ընտանիքի ամենափոքր երեխայի մարմնի և բերանի խոռոչի շրջանում ցան է առաջացել, ինչպես նաև բարձրացել է ջերմությունը։ Կարճ ժամանակ անց նույն ախտանիշներն ի հայտ են եկել նաև մյուս երկու երեխաների մոտ։ Արդյունքում ընտանիքի արձակուրդի գրեթե ամբողջ ընթացքում երեխաները բուժում են ստացել։

Աննայի պնդմամբ՝ հյուրանոցի բժիշկը սկզբում չի ցուցաբերել անհրաժեշտ օգնություն՝ ապահովագրության հետ կապված հարցերի պատճառով։ Թեև հյուրանոցի ղեկավարությունը հոսպիտալացում է առաջարկել, բժիշկը, երեխաներին զննելուց հետո, որոշել է, որ դրա անհրաժեշտությունը չկա և խորհուրդ է տվել ընտանիքին մեկուսանալ հյուրանոցի սենյակում։ Որպես փոխհատուցում՝ նրանց առաջարկվել է անվճար օգտվել լողափի տաղավարից մինչև հանգստի ավարտը։

Ինչպես հայտնում է Past.am-ը, զբոսաշրջիկը նաև նշել է, որ հյուրանոցում հանգստացող այլ ընտանիքների երեխաների մոտ ևս նկատվել են նույն ախտանիշները։ Նրա խոսքով՝ չնայած դրան, հյուրանոցի ղեկավարությունը բավարար միջոցներ չի ձեռնարկել հնարավոր վարակի տարածումը կանխելու ուղղությամբ։

Հետևեք մեզ՝ այստեղ