Ինչ ճակատագիր ունեցան հիվանդանոցում փոխանակված նորածինները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Past.am-ի փոխանցմամբ՝ ԱՄՆ-ում երկու ընտանիք դատական հայց է ներկայացրել Գրաֆտոն քաղաքի «Յունիթի» հիվանդանոցի դեմ՝ պնդելով, որ իրենց նորածին երեխաները 36 տարի առաջ փոխանակվել են ծննդատանը։

Տեղական լրատվամիջոցների տեղեկություններով՝ պատմությունը բացահայտվել է 2024 թվականին, երբ 36-ամյա Ջերեմի Մորիսոնը գենետիկական թեստ է հանձնել և պարզել, որ իրեն մեծացրած ծնողները կենսաբանական ծնողները չեն։ Նրա խոսքով՝ մանկուց զգացել է, որ արտաքինով տարբերվում է ընտանիքի մյուս անդամներից, սակայն երբեք չի մտածել, որ դա կարող է կապված լինել ծննդատանը տեղի ունեցած սխալի հետ։

Հետագա ԴՆԹ հետազոտությունների արդյունքում ընտանիքը հայտնաբերել է Քայլ Բեյլին անունով տղամարդու, որը ծնվել է նույն օրը և նույն հիվանդանոցում՝ ընդամենը մի քանի ժամվա տարբերությամբ։ Այս հանգամանքը հիմք է դարձել ենթադրելու, որ նորածինները կարող էին փոխանակվել հիվանդանոցում։

Հիվանդանոցը, սակայն, հերքում է մեղադրանքները։ Կառույցի ներկայացուցիչների խոսքով՝ այդ ժամանակահատվածի աշխատակիցներն այլևս չեն աշխատում այնտեղ, իսկ անհրաժեշտ փաստաթղթերի մեծ մասը չի պահպանվել։ Նրանք հայտարարել են, որ ներկայումս չունեն հաստատող ապացույցներ, որոնք կվկայեին հիվանդանոցի պատասխանատվության մասին։

Հաղորդվում է, որ ընտանիքները արդեն հանդիպել են իրենց կենսաբանական որդիներին, մինչդեռ Ջերեմի Մորիսոնն ու Քայլ Բեյլինը դեռևս անձամբ չեն հանդիպել։ Գործի քննությունը շարունակվում է դատարանում։

Հետևեք մեզ՝ այստեղ