ՌԴ-ն հայտնել է Օդեսայի և Չեռնոմորսկի նավահանգիստներին հարվածներ հասցնելու մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ռուսաստանցի զինվորականները հայտարարել են, որ Ուկրաինայի Օդեսայի և Չեռնոմորսկի նավահանգիստների ուղղությամբ հուլիսի 17-ի գիշերային հարվածների ժամանակ վնասվել են վառելիքի և քսանյութերի հետ կապված ենթակառուցվածքները, անօդաչու թռչող սարքերի գործարանները, զինամթերքի պահեստը։ Այս մասին հաղորդում է «Ինտերֆաքս» գործակալությունը։

«Օդեսայի նավահանգստում հարվածների հետևանքով վնասվել են վառելիքի և քսանյութերի բեռնաթափման համար օգտագործվող նավահանգստային ենթակառուցվածքային օբյեկտները և Ուկրաինայի զինված ուժերի համար նախատեսված վառելիքի պահեստավորման բաքերը», – հայտարարել է Ռուսաստանի պաշտպանության նախարարությունը։

Ըստ գերատեսչության՝ Օդեսայի նավահանգստում նաև վնասվել են ԱԹՍ-ների արտադրության և հավաքման երկու արհեստանոց, այդ թվում՝ «Ուկրջեթ»-ընկերության UJ-22 միջին հեռահարության ԱԹՍ-ների ենթահավաքման կայանը, ինչպես նաև զինամթերքի պահեստ։

Հայտարարության մեջ նշվում է, որ ուկրաինական նավահանգիստների վրա գիշերային հարվածները հասցվել են օդային տեղակայման ճշգրիտ զենքերով և ԱԹՍ-ներով։

Հուլիսի 16-ին Օդեսայի վրա ռուսական հարվածների հետևանքով 2 մարդ է զոհվել, 10 մարդ՝ վիրավորվել։

Բացի այդ, Ռուսաստանի պաշտպանության նախարարությունը հայտնել է, որ նախորդ շաբաթվա ընթացքում ՀՕՊ համակարգերը խոցել են 4661 ուկրաինական ԱԹՍ, 68 կառավարվող ռումբ, ամերիկյան արտադրության յոթ HIMARS հրթիռ, երկու հեռահար թևավոր հրթիռ։

Ուկրաինայի ռազմաօդային ուժերը հայտնել են, որ հուլիսի 17-ի գիշերը Ուկրաինայի ուղղությամբ արձակվել է 8 հրթիռ և 130 անօդաչու թռչող սարք։

«Հակաօդային պաշտպանության ուժերին հաջողվել է ոչնչացնել հինգ հրթիռ և տարբեր տեսակի 115 անօդաչու թռչող սարք», – նշվում է հաղորդագրության մեջ։

«ՌԲԿ-Ուկրաինա»-ի տեղեկացմամբ՝ հուլիսի 17-ի առավոտյան ռուսական հարձակողական ԱԹՍ-ները թիրախավորել են Նիկոլաևի նավահանգստային ենթակառուցվածքները, որի հետևանքով 2 մարդ է զոհվել։

Հարվածի հետևանքով վնասվել է օտարերկրյա դրոշներով նավարկող և այնտեղ խարիսխ գցած երեք քաղաքացիական նավ։

Խերսոնի Դնեպրովսկի շրջանի վրա ռուսական անօդաչու թռչող սարքի հարձակման հետևանքով 70-ամյա բնակիչ է զոհվել։

Հետևեք մեզ՝ այստեղ