Խոստանում եմ այսուհետ ավելի ակտիվ գործել. Սյուզի Մելիքյանն՝ ապագա ծրագրերի ու նոր տեսահոլովակի մասին

Life.panorama.am-ը գրում է.

Ընդամենը մի քանի օր անց՝ փետրվարի 22-ին, տեղի կունենա երգչուհի, դիմահարդար Սյուզի Մելիքյանի նոր տեսահոլովակի պրեմիերան: «Ինձ գրկիր»՝ այսպես է կոչվում երգչուհու նոր տեսահոլովակը, որի թրելյերն արդեն հասանելի է համացանցում:

«Նոր երգիս երաժշտության հեղինակը Էդգար Ալեքսանյանն է, իսկ խոսքերը գրել է Ավետ Բարսեղյանը: Աշխատել եմ շատ տաղանդավոր ու պրոֆեսիոնալ մարդկանց հետ, հուսամ` իմ երկրպագուները նոր աշխատանքիս որակից գոհ կմնան»,- Life.panorama.am-ի հետ զրույցում պատմեց Սյուզի Մելիքյանը:

Երակարատեւ դադարից հետո Սյուզի Մելիքյանը նոր տեսահոլովակի համար կրկին համագործակցել է Արտյոմ Աբովյանի հետ. «Սա Արտյոմ Աբովյանի հետ իմ երկրորդ աշխատանքն է, շատ բարձր եմ  գնահատում նրա գործերը, իրար անմիջապես հասկանում ենք, արդյունքում ստանում ենք մեզ գոհացնող արդյունք: Տեսահոլովակում փորձել ենք ցույց տալ հույզեր, ապրումներ, որն ունենում է յուրաքանչյուրը, երբ սիրում է. չկա հատուկ սյուժետային գիծ, բայց փոխարենը կա իմաստ եւ հանգուցալուծում, որն ամեն մեկն իր տեսանկյունով կհասկանա»,- պատմեց Սյուզի Մելիքյանը:

«Երգս աղջկական ապրումների մասին է, շատ գեղեցիկ մեղեդային երգ է, որի մեջ կարծում եմ, շատերն իրենց կգտնեն: Բովանդակային մասով չեմ ցանկանա նախապես խոսել, միայն կասեմ, որ այն այսօրվա իրականության մասին է, շատ հուզիչ է, դրանից ելնելով էլ երեւի հոգեհարազատ կլինի շատերին»,- նշեց երգչուհին:

Տեսահոլովակում իր ոճով Սյուզին անձամբ է զբաղվել. «Տեսահոլովակում ոճիս հետ կապված մտահղացումներն իմն են, որոնք իրականացրել են տաղանդավոր մասնագետները»,- նկատեց նա:

Իսկ վերջում երգչուհին հավելեց. «Վերջին շրջանում, երբ ավելի շատ զբաղված էի նոր մասնագիտությանս աճով, մի տեսակ պասիվություն էի ցուցաբերում երգարվեստում, իսկ այս տեսահոլովակս հուսամ նոր ու ավելի ակտիվ աշխատանքի մեկնարկը կլինի: Իհարկե, ապագա պլաններից չեմ սիրում խոսել, բայց խոստանում եմ այսուհետ ավելի ակտիվ գործել»:

Հեղինակ՝ Անուշիկ Մելքոնյան