«Մենք» ազգային պարի երեխաների խումբը տոնում է 5-ամյակը

ՄՇԱԿՈՒՅԹ 6 Հուլիս, 2026 22:55

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երևանի Հովհաննես Թումանյանի անվան պետական տիկնիկային թատրոնում հուլիսի 5-ին կայացավ «Մենք» ազգային պարի երեխաների խմբի «Մենքի մանկտիք» խորագրով մենահամերգը՝ նվիրված խմբի 5-ամյակին։

Համերգի ընթացքում հանդես եկան «Մենք»-ի Երևանի խմբերի սաները, ինչպես նաև Շիրակի մարզի Սառնաղբյուր համայնքի մասնաճյուղի երեխաները՝ հանդիսատեսին ներկայացնելով հայկական ավանդական պարերի բազմազանությունն ու գեղեցկությունը։

«Երեխաներին մշակույթին մոտ պահելով՝ ավելի մոտ եք պահում Արարատին, Արցախին, Մուշին և մեր բոլոր ինքնաճանաչողության արժեքներին»,- ծնողներին դիմելով՝ շեշտեց խմբի պարուսույց Աշոտ Առաքելյանը: Նրա համոզմամբ՝ երեխաներին ազգային մշակույթին հաղորդակից դարձնելով է միայն հնարավոր ունենալ ճիշտ կրթված սերունդ:

«Ուժեղանալու տեղ դեռ ունենք և անպայման կուժեղանանք, բայց հասել ենք մի աստիճանի, որտեղ արդեն կարող ենք հպարտությամբ ասել, որ արհեստավարժ խումբ ունենք»,- իր շնորհավորական խոսքում նշեց «Մենք»-ի հիմնադիր, պարուսույց Ստեփան Թորոյանը:

Համերգը ոչ միայն հնգամյա ճանապարհի մասին հաշվետվություն էր, այլև տարբեր կառույցների և կազմակերպությունների սաներին ազգային մշակույթի շուրջ համախմբելու փորձ: Խմբի նախաձեռնությամբ համերգին՝ որպես հատուկ հյուրեր, հրավիրված էին մի շարք համայնքների սոցիալական և կրթական կազմակերպությունների երեխաներ, որոնց համար մշակութային միջոցառումներին մասնակցելու հնարավորությունները հաճախ սահմանափակ են։

«Մենք»-ի համար սա այն գաղափարի շարունակությունն է, որ մշակույթը պետք է հասանելի լինի յուրաքանչյուր երեխայի։

Միջոցառման կազմակերպիչների խոսքով՝ «Մենք»-ի առաքելությունը միայն ազգային պարի ուսուցումը չէ։ Խումբը ձգտում է ստեղծել այնպիսի մշակութային միջավայր, որտեղ երեխաները կարող են ճանաչել իրենց արմատները, ձեռք բերել բեմական փորձ, ձևավորել ընկերական կապեր և միասին ապրել հայկական մշակույթը։

«Մենք» ազգային պարի խումբը հիմնադրվել է 2012 թվականին Ստեփան Թորոյանի կողմից՝ հայկական ավանդական պարի ուսումնասիրման, պահպանման և հանրահռչակման նպատակով։ Ինչպես նշեց Ստեփան Թորոյանը, այս պահին «Մենք»-ի՝ խոյի և գեղարդի նշանով նարնջագույն դրոշի ներքո արդեն 12 պրոֆեսիոնալ և սիրողական խումբ է գործում Երևանում և մարզերում՝ ազգային պարը նախընտրող 5-80 տարեկանների համար:

Համերգի ավարտին դահլիճը վեր էր ածվել մի մեծ բեմահարթակի, իսկ ազգային մշակույթը սիրող և գնահատող հանդիսատեսը դարձել էր համերգի մասնակից և ինքնամոռաց պարում էր հայկական զուռնայի և կոպալի խրոխտ հնչյունների ներքո:

Հետևեք մեզ՝ այստեղ