«Արարատ-Արմենիա»-ի եվրագավաթի հայտացուցակը և մեկնարկային կազմը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

ՈՒԵՖԱ-ն հրապարակել է 2026/27 մրցաշրջանի Չեմպիոնների լիգայի որակավորման առաջին փուլի մասնակիցների հայտացուցակները։ Հայաստանի չեմպիոն «Արարատ-Արմենիան» եվրագավաթային մրցաշրջանը կսկսի Լատվիայի չեմպիոն «Ռիգա»-ի դեմ հանդիպումներով։

Հայկական ակումբի հայտացուցակը հնարավորություն է տալիս հասկանալ, թե ինչ կազմով է Մանուել Տուլիպայի թիմը մոտենում նոր մրցաշրջանի մեկնարկին և ինչ փոփոխություններ են տեղի ունեցել ամառային տրանսֆերային պատուհանի ընթացքում։ Առաջին փուլի համար «Արարատ-Արմենիան» հայտավորել է 23 ֆուտբոլիստի՝ 10 հայ և 13 լեգեոներ։

Այս հայտացուցակը կգործի նաև «Ռիգա»-ի դեմ պատասխան հանդիպման համար։ Եթե թիմը հաղթահարի առաջին փուլը և դուրս գա Չեմպիոնների լիգայի որակավորման երկրորդ փուլ, ակումբը կկարողանա փոփոխություններ կատարել հայտացուցակում։

«Արարատ-Արմենիայի» հայտացուցակը Չեմպիոնների լիգայի որակավորման առաջին փուլի համար

Դարպասապահներ

• Արման Ներսեսյան -Հայաստան, 24 տարեկան
• Ժոաո Բրավիմ -Բրազիլիա, 28 տարեկան, նորեկ

Պաշտպաններ

• Ուգո Օլիվեյրա — Պորտուգալիա, 24 տարեկան, աջ պաշտպան
• Կամո Հովհաննիսյան — Հայաստան, 33 տարեկան, աջ պաշտպան
• Խուլիո Բուենո — Հայաստան, 29 տարեկան, կենտրոնական պաշտպան
• Լուիս Ֆելիպե — Բրազիլիա, 25 տարեկան, կենտրոնական պաշտպան, նորեկ
• Բրունու Վիլսոն — Պորտուգալիա, 29 տարեկան, կենտրոնական պաշտպան, նորեկ
• Ալեքսանդրոս Մալիս — Հունաստան, 29 տարեկան, կենտրոնական պաշտպան
• Բրունու Պերեյրա — Պորտուգալիա, 28 տարեկան, ձախ պաշտպան, նորեկ
• Էդգար Գրիգորյան — Հայաստան, 27 տարեկան, ձախ պաշտպան

Կիսապաշտպաններ

• Միշել Այվազյան — Հայաստան, 21 տարեկան, վերադարձել է ԲԿՄԱ-ից
• Արմեն Համբարձումյան — Հայաստան, 32 տարեկան
• Մաքսանս Կառլյե — Ֆրանսիա, 29 տարեկան, նորեկ
• Կարեն Մուրադյան — Հայաստան, 33 տարեկան
• Ալվին Տերա — Քենիա, 29 տարեկան

Հարձակվողներ

• Ժիրայր Շաղոյան — Հայաստան, 25 տարեկան, ձախ վինգեր
• Զիդան Բանջակի — Գվինեա-Բիսաու, 27 տարեկան, ձախ վինգեր
• Արթուր Սերոբյան — Հայաստան, 23 տարեկան, աջ վինգեր
• Կառլոս Ֆրանսա — Բրազիլիա, 31 տարեկան, կենտրոնական հարձակվող, նորեկ
• Ալիուն Նդուր — Սենեգալ, 28 տարեկան, կենտրոնական հարձակվող
• Փոլ Այոնգո — Գանա, 29 տարեկան, կենտրոնական հարձակվող
• Սանդրո Լիմա — Բրազիլիա, 35 տարեկան, կենտրոնական հարձակվող, նորեկ

Գլխավոր փոփոխությունները՝ պաշտպանությունում

Ամառային տրանսֆերային պատուհանի ընթացքում «Արարատ-Արմենիան» ամենամեծ փոփոխությունները կատարել է պաշտպանության գծում։ Թիմից հեռացած ձախ պաշտպան Հակոբ Հակոբյանին փոխարինել է Բրունու Պերեյրան, որը տեղափոխվել է պորտուգալական «Պենաֆիելից»։ Ամենայն հավանականությամբ, նա կպայքարի Էդգար Գրիգորյանի հետ մեկնարկային կազմի տեղի համար և կօգտագործվի ռոտացիայի շրջանակում։

Լուրջ փոփոխություններ են տեղի ունեցել նաև կենտրոնական պաշտպանությունում։ Թիմը լքել են Ժոաո Կեյրուշն ու Բուշայբ Արասին, որոնց փոխարինել են Բրունու Վիլսոնն ու Լուիս Ֆելիպեն։ Հատկապես կարևոր ձեռքբերում է համարվում Վիլսոնի տրանսֆերը․ նրա փորձն ու մակարդակը թույլ են տալիս ակնկալել, որ նա անմիջապես կդառնա հիմնական կազմի խաղացող և կփոխարինի Կեյրուշին։

Բալանտան չի հայտավորվել առաջին փուլի համար

Կիսապաշտպանությունում «Արարատ-Արմենիան» ունի նկատելի կորուստ։ Անցած մրցաշրջանի լավագույն ֆուտբոլիստներից մեկը՝ Խուան Բալանտան, դեռևս չի հեռացել ակումբից, սակայն չի ընդգրկվել Չեմպիոնների լիգայի որակավորման առաջին փուլի հայտացուցակում։

Նրա փոխարեն ակումբը պայմանագիր է կնքել ֆրանսիացի կիսապաշտպան Մաքսանս Կառլյեի հետ, որը տեղափոխվել է «Նանսիից»։ Բալանտային լիարժեք փոխարինելը հեշտ չի լինի, սակայն Կառլյեն կարող է որակյալ համալրում դառնալ կենտրոնական գծի համար։ Բացի այդ, Մանուել Տուլիպայի տրամադրության տակ շարունակում են մնալ փորձառու Կարեն Մուրադյանն ու Ալվին Տերան, որոնք վաղուց հանդես են գալիս «Արարատ-Արմենիայի» կազմում և լավ ծանոթ են թիմի խաղային պահանջներին։

Հարձակումը շարունակում է մնալ թիմի ուժեղ կողմը

Հարձակման գծում մեծ վերափոխումներ չեն եղել, սակայն հենց այս գիծն էլ շարունակում է համարվել «Արարատ-Արմենիայի» գլխավոր ուժերից մեկը։ Ակումբը պայմանագիր է կնքել երկու փորձառու բրազիլացի հարձակվողների հետ, որոնք ունեն տարբեր խաղային հատկանիշներ։

Սանդրո Լիման բարձրահասակ և ֆիզիկապես հզոր կենտրոնական հարձակվող է, որը տեղափոխվել է Պորտուգալիայի առաջնությունից։ Իսկ Կառլոս Ֆրանսան, որը հանդես էր գալիս Ինդոնեզիայի առաջնությունում, ավելի շարժուն ֆուտբոլիստ է և կարող է խաղալ ոչ միայն կենտրոնում, այլև եզրում կամ երկրորդ հարձակվողի դիրքում։

Միևնույն ժամանակ, եվրագավաթային մրցաշրջանի մեկնարկին երկու նորեկներն էլ, ամենայն հավանականությամբ, հիմնականում կօգտագործվեն խաղի ընթացքում ուժեղացման տարբերակներ ապահովելու համար։ Թիմի հիմնական հարձակման եռյակը կարող է կազմվել հետևյալ կերպ՝ Արթուր Սերոբյան — Ալիուն Նդուր — Զիդան Բանջակի։

«Արարատ-Արմենիայի» հնարավոր մեկնարկային կազմը

Չորս պաշտպանով դասավորության դեպքում թիմի օպտիմալ մեկնարկային կազմը կարող է լինել հետևյալը․

Բրավիմ — Կամո Հովհաննիսյան, Խուլիո Բուենո, Բրունու Վիլսոն, Էդգար Գրիգորյան — Մաքսանս Կառլյե, Ալվին Տերա, Արմեն Համբարձումյան — Արթուր Սերոբյան, Ալիուն Նդուր, Զիդան Բանջակի։

Միաժամանակ, հաշվի առնելով հայտացուցակում ընդգրկված ֆուտբոլիստների կազմը, չի կարելի բացառել նաև հինգ պաշտպանով տարբերակը։ Այդ դեպքում Ալեքսանդրոս Մալիսը կարող է հանդես գալ որպես երրորդ կենտրոնական պաշտպան՝ փոխարինելով կիսապաշտպաններից մեկին։

Չեմպիոնների լիգայի որակավորման առաջին փուլը լուրջ փորձություն կլինի «Արարատ-Արմենիայի» նորացված կազմի համար։ Թիմը զգալիորեն թարմացրել է պաշտպանությունը, ձեռք է բերել նոր դարպասապահ և մեծացրել է հարձակման գծի խորությունը, սակայն «Ռիգայի» դեմ հանդիպումներից առաջ գլխավոր հարցն այն է, թե որքան արագ նորեկները կհարմարվեն Հայաստանի չեմպիոնի խաղային համակարգին։

Հայկական թիմի մրցակիցը ներկայումս լավ մարզավիճակում է։ Լատվիայի առաջնությունն անցկացվում է «գարուն-աշուն» համակարգով, ուստի «Ռիգան» այս հանդիպումներին կմոտենա լավ խաղակցված կազմով և բարձր ֆիզիկական պատրաստվածությամբ։

Հետևեք մեզ՝ այստեղ