Ֆրանսիայի հարավը պատել են լայնածավալ անտառային հրդեհները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Ֆրանսիայի հարավում հինգշաբթի շարունակում են մոլեգնել լայնածավալ անտառային հրդեհները, որոնք ուժգնացել են երկիրը պատուհասած մի քանի շաբաթ տևած երաշտի և ռեկորդային շոգի ֆոնին, հայտնում է Associated Press-ը։

Ամենախոշոր հրդեհի օջախը տարածվել է Օդ և Էրո շրջաններում, որտեղ, տեղի իշխանությունների տվյալներով, մարման աշխատանքներում ներգրավվել է մինչև 800 հրշեջ և մոտ 150 միավոր տեխնիկա։ Կրակը պատել է ավելի քան 900 հեկտար տարածք։Լրացուցիչ կերպով նոր օջախներ են առաջացել Մարսելի շրջանում։

Հինգշաբթի բռնկված երկու հրդեհները հաջողվել է վերահսկողության տակ առնել, սակայն դրանք դեռևս ամբողջությամբ չեն մարվել։

Ֆրանսիայի վարչապետ Սեբաստիեն Լըկոռնյուն հայտարարել է, որ ամառային սեզոնի սկզբից ի վեր երկրում տեղի է ունեցել գրեթե 7000 հրդեհ, որոնց հետևանքով արդեն այրվել է շուրջ 8700 հեկտար տարածք։ Նա իրավիճակը որակել է որպես «բավականին լարված»։

Օդ շրջանում կրակի դեմ պայքարի համար գործի են դրվել չորս հրշեջ ինքնաթիռներ։ Տեղի իշխանությունները նշել են, որ առաջնահերթությունը կրակի տարածումը հնարավորինս արագ զսպելն է՝ հաշվի առնելով ջերմաստիճանի բարձրացումն ու քամու ուժգնացումը։

Ֆրանսիայի հարավային շրջանները ավանդաբար հակված են անտառային հրդեհների, իսկ անցյալ տարի հենց այս տարածաշրջանում էր հաջողվել տեղայնացնել վերջին տասնամյակների ամենախոշոր հրդեհը։

Հրդեհների առանձին օջախներ պատել են նաև Կանե ան Ռուսիյոն ափամերձ շրջանը, որտեղ երեք ճամբարներից տարհանվել է մոտ 1500 մարդ։ Կրակը ոչնչացրել է հարյուրավոր շարժական տնակներ։

Տարածաշրջանային իշխանությունների խոսքով՝ հրշեջները «դաժան պայքար» են մղում՝ կրակի տարածումը դեպի արդյունաբերական գոտի կանխելու համար։

Օդերևութաբանները նախազգուշացնում են, որ բարձր ջերմաստիճանը և չորային պայմանները կպահպանվեն առաջիկա օրերին՝ տեղումների բացակայության պարագայում, իսկ Միջերկրածովյան տարածաշրջանում ուժեղ քամին լրացուցիչ կերպով բարդացնում է իրավիճակը։

Հետևեք մեզ՝ այստեղ