Ջերմատնային տնտեսությունները կստանան արտոնյալ վարկեր՝ արտահանման խնդիրները հաղթահարելու համար

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իրավական ակտերի նախագծերի հրապարակման միասնական հարթակում՝ e-draft.am-ում, հանրային քննարկման է ներկայացվել ջերմատնային տնտեսություններին աջակցության նոր ծրագիր։

Ինչպես տեղեկացնում է Iravaban.net-ը, նախագծի հիմնավորման համաձայն՝ Հայաստանի ջերմատներում արտադրվող լոլիկի, վարունգի, պղպեղի, ելակի և ծաղիկների զգալի մասն արտահանվում է Ռուսաստանի Դաշնություն։ Սակայն Ռոսսելխոզնադզորի կողմից կիրառված բուսասանիտարական սահմանափակումների հետևանքով մի շարք տնտեսություններ բախվել են արտադրանքի իրացման դժվարությունների և ֆինանսական կորուստների։

Չնայած նոր արտահանման շուկաներ ձևավորելու ուղղությամբ իրականացվող քայլերին՝ ներկայումս հնարավոր չէ ամբողջ արտադրանքը իրացնել նախատեսված գներով։ Միաժամանակ, ջերմատներում մշակաբույսերի աճեցման գործընթացը չի կարող դադարեցվել, ինչի պատճառով տնտեսավարողները ունեն լրացուցիչ ֆինանսական միջոցների անհրաժեշտություն՝ գործունեության շարունակականությունն ապահովելու համար։

Նախագծով առաջարկվում է ջերմատնային տնտեսություններին տրամադրվող վարկերի տոկոսադրույքների սուբսիդավորման ծրագիր, որի նպատակն է ապահովել ֆինանսական ռեսուրսների ժամանակավոր հասանելիություն և աջակցել տնտեսություններին՝ արտահանման սահմանափակումների պայմաններում առաջացած մարտահրավերները հաղթահարելու համար։

Ընթացիկ իրավիճակը և խնդիրները 

Հայաստանի Հանրապետության ջերմատնային տնտեսություններում արտադրվող լոլիկի, վարունգի, պղպեղի, ծաղիկների, ելակի զգալի մասը արտահանվում է Ռուսաստանի Դաշնություն և Ռոսսելխոզնադզորի կողմից բուսասանիտարական հսկման ենթակա ապրանքների նկատմամբ կիրառված արտահանման սահմանափակումների արդյունքում ջերմատնային տնտեսությունները կրում են ֆինանսական կորուստներ։ Չնայած այլ երկրների շուկաներ արտահանման հնարավորությունների ստեղծման նպատակով ձեռնարկվող քայլերին, այնուամենայնիվ, ներկայումս հնարավոր չի լինում ապահովել արտադրված ամբողջ արտադրանքի իրացումը ակնկալվող գների սահմաններում։ Հաշվի առնելով, որ ջերմատներում մշակաբույսերի մշակության ցիկլը հնարավոր չէ դադարեցնել, ուստի արտադրության շարունակակունությունը ապահովելու նպատակով անհրաժեշտ են հասանելի ֆինանսական ռեսուրսներ։

Կարգավորման նպատակը և բնույթը

Նախագծով հաստատվող Ծրագիրն ուժի մեջ մտնելու օրվան հաջորդող օրվանից մինչև 2026 թվականի սեպտեմբերի 1-ը շահառուն կարող է դիմել ՖԿ-ին Ծրագրի պահանջներին համապատասխան վարկեր ներգրավելու համար։

Աջակցությունը տրամադրվում է ՖԿ-ների կողմից շահառուներին տրամադրված նպատակային վարկերի տոկոսադրույքների սուբսիդավորման ձևով:

Սուբսիդավորվում են այն վարկերի տոկոսադրույքները, որոնք տրամադրվում են շահառուներին հետևյալ ծախսերի իրականացման նպատակով․

1) գազի, էլեկտրաէներգիայի և ջրի սպասարկման վճարներ,

2) պետական կամ համայնքի բյուջե հարկեր և պարտադիր վճարումներ,

3) շահառուի աշխատակիցներին աշխատավարձ և դրան հավասարեցված վճարումներ։

Ծրագրի շրջանակներում յուրաքանչյուր շահառուին վարկը տրամադրվում է 18 ամիս ժամկետով՝ վարկի մայր գումարի և տոկոսադրույքի 12 ամիս արտոնյալ ժամկետով։ Վարկերի տոկոսադրույքների սուբսիդավորումը կիրականացվի 12 տոկոսային կետով։ Վարկի տրամադրման համար հիմք է հանդիսանում 2025 թվականին վճարված հարկերի հանրագումար, գազի և էլեկտրաէներգիայի դիմաց կատարված վճարների հանրագումարների և աշխատակիցներին վճարված աշխատավարձերի ընդհանուր ծախսերի կեսը, բայց ոչ ավելի քան 100․0 մլն դրամը։

Յուրաքանչյուր 1 հա ջերմատան համար առավելագույն վարկի սահմանաչափը կազմում է ոչ ավել քան 100․0 մլն դրամ գումար։

Վարկի ներգրավման գործընթացը նախաձեռնում է շահառուն, որն այդ նպատակով դիմում է ՖԿ-ին՝ կցելով 2026 թվականին իրացված գյուղատնտեսական արտադրանքի վերաբերյալ Հայաստանի Հանրապետության պետական եկամուտների կոմիտեի կողմից տրամադրված տեղեկանք (իրավաբանական անձ կամ անհատ ձեռնարկատեր հանդիսացող շահառուների համար) կամ հայտարարագիր (ֆիզիկական անձ հանդիսացող շահառուների համար, հայտարարագրի օրինակելի ձևը մինչև հունիսի 30-ը հրապարակվում է նախարարության կայքում), ինչպես նաև ջերմատնային տնտեսության անշարժ գույքի նկատմամբ իրավունքների պետական գրանցման վկայականի պատճենը:

Ծրագրով ՖԿ-ների կողմից տրամադրվող նպատակային վարկերի պայմաններն են՝

1) վարկը տրամադրվում է Հայաստանի Հանրապետության դրամով առավելագույնը տարեկան մինչև 14 տոկոս փաստացի տոկոսադրույքով, ընդ որում, վարկի հետ կապված ՖԿ-ի ծառայությունների համար այլ վճարներ չեն գանձվում (կանխիկացման վճար, սպասարկման վճար, միջնորդավճարներ և այլն).

 Նախագծի մշակման գործընթացում ներգրավված ինստիտուտները և անձինք

Նախագիծը մշակվել է Էկոնոմիկայի նախարարության կողմից։ Նախագծի մշակմանն այլ ինստիտուտներ և անձինք չեն մասնակցել:

Ակնկալվող արդյունքը

Նախագծի ընդունման արդյունքում հնարավոր կլինի ապահովել ջերմատնային տնտեսությունների գործունեության շարունակականությունը և բարձրացնել արտադրողականությունը։

 Հայաստանի Հանրապետության պետական բյուջեի եկամուտներում և ծախսերում սպասվելիք փոփոխությունները 

Նախագծի ընդունման արդյունքում 2026 թվականի պետական բյուջեում եկամուտների կամ ծախսերի էական փոփոխություն չի նախատեսվում, իսկ 2027 թվականի ՀՀ պետական բյուջեի ծախսերը կավելանան։

 Կապը ռազմավարական փաստաթղթերի հետ

Հայաստանի վերափոխման ռազմավարություն 2050, Կառավարության 2021-2026 թվականների ծրագիր, ոլորտային և/կամ այլ ռազմավարություններ – Սույն որոշման նախագիծը բխում է Հայաստանի Հանրապետության գյուղատնտեսության ոլորտի տնտեսական զարգացումն ապահովող հիմնական ուղղությունների 2020-2030 թվականների ռազմավարության «Բարձրացնել գյուղատնտեսական ոլորտի մրցունակությունն ու արդյունավետությունը» և «Խթանել թվային գյուղատնտեսությունը և տեխնոլոգիական նորարարությունը» առաջնահերթություններում կարևորվում է արժեշղթաների առևտրայնացման, արդիականացման և մեքենայացման ներդրումների իրականացումը, նորարարական տեխնոլոգիաների կիրառումը (էջ՝ 43 և 75), – տեղեկացնում է Iravaban.net–ը։

Հետևեք մեզ՝ այստեղ