Անվտանգային անդունդ և պետականության փրկության հրամայականը. Արշակ Կարապետյանի ահազանգը. «Փաստ»

«Փաստ» օրաթերթը գրում է.

Կայացած հեռավար մամուլի ասուլիսի ընթացքում «Համահայկական ճակատ» շարժման առաջնորդ, պաշտպանության նախկին նախարար, գեներալ-մայոր Արշակ Կարապետյանն արմատական վերլուծության է ենթարկել Հայաստանի առջև ծառացած ներքաղաքական և արտաքին անվտանգային լրջագույն մարտահրավերները՝ սուր քննադատության արժանացնելով գործող իշխանությունների որդեգրած կուրսը։ Բանախոսի գնահատմամբ, պաշտոնական Երևանի հռչակած խաղաղության օրակարգը զուրկ է իրական երաշխիքներից և գործուն քայլերից, ինչի հետևանքով պետությունը հայտնվել է անպաշտպան վիճակում՝ կանգնելով տարածքային նոր կորուստների և պետականության կորստի իրական վտանգի առջև։

Արշակ Կարապետյանը փաստել է, որ միջազգային ասպարեզում իշխանությունների վարած դիվանագիտությունը ձախողվել է՝ հանգեցնելով տարածաշրջանային ավանդական գործընկերների հետ հարաբերությունների ճգնաժամին և Հայաստանի լիակատար մարգինալացմանը։ Նրա խոսքով, տարածաշրջանի աշխարհաքաղաքական վերաձևումների համատեքստում հայկական շահն այլևս հաշվի չի առնվում, իսկ հարևան պետություններն արդեն իսկ բացահայտ հավակնություններ են ձևավորում Հայաստանի ինքնիշխան տարածքների, մասնավորապես՝ Լոռու, Սյունիքի և Սևանի նկատմամբ։ Գեներալ-մայորն ընդգծել է, որ միակողմանի զիջումներն ու սեփական թուլության ցուցադրումը ոչ թե կանխում, այլ ընդհակառակը՝ անխուսափելի են դարձնում նոր պատերազմի հավանականությունը՝ խրախուսելով հակառակորդի ագրեսիվ նկրտումները։

Անդրադառնալով ներքին իրավիճակին և հանրային մոբիլիզացիային՝ նախկին նախարարը տեղեկացրել է, որ «Համահայկական ճակատ» շարժման կողմից Ազատության հրապարակում սկսված ստորագրահավաքը շարունակվում է և առաջիկայում ընդլայնվելու է նաև հանրապետության մարզերում։ Բանախոսը շեշտել է, որ քաղաքացիների կողմից ստացված ստորագրությունները հիմք կհանդիսանան հետագա քայլերի համար։ Ըստ Արշակ Կարապետյանի, ստեղծված ճգնաժամից դուրս գալու միակ արդյունավետ ուղին սեփական ազգայինպետական շահերի գերակայությունն է, համակարգային կոռուպցիան իրապես արմատախիլ անելը և ռեսուրսների ճիշտ վերաբաշխումը։ Նա կանխատեսել է, որ առաջիկա ամիսներին երկրում սպասվում են նոր ընտրական գործընթացներ, որոնք հանդիսանալու են վերջին հնարավորությունը՝ ազգային իշխանություն ձևավորելու և հայկական պետականության կործանումը կանխելու համար։

Մանրամասները՝ «Փաստ» օրաթերթի այսօրվա համարում