Իսպանիայում խոշոր անտառային հրդեհ է բռնկվել․ կրակը ընդգրկել է շուրջ 330 հեկտար, բնակիչները տարհանվել են

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իսպանիայի հյուսիս-արևմուտքում՝ Պադրոն համայնքի Էրբոն շրջանում, ուրբաթ բռնկված խոշոր անտառային հրդեհը դեռևս չի մեկուսացվել և արդեն ոչնչացրել է մոտ 330 հեկտար տարածք, հայտնում է Euronews-ը։

Իշխանությունները հայտարարել են վտանգի երկրորդ մակարդակ, իսկ մի շարք տների բնակիչներ տարհանվել են։ Հրդեհը բռնկվել է հունիսի 13-ի ցերեկը և շարունակում է տարածվել։ Պադրոնի քաղաքապետ Անխո Ռեյ Արկան հայտնել է, որ հրդեհը դուրս է եկել համայնքի սահմաններից և տարածվել հարևան Թեո համայնքի տարածք, ինչը բարդացրել է արտակարգ ծառայությունների աշխատանքը։

Կռուշեյրաս-դե-Աբայշո բնակավայրից տարհանվել են վտանգի գոտում հայտնված տասը տան բնակիչներ։ Շաբաթ երեկոյի դրությամբ նրանց դեռ թույլ չեն տվել վերադառնալ տուն։ Իրավիճակը բարդացնում են օդի բարձր ջերմաստիճանը, որը գերազանցում է 30 աստիճանը, և ուժեղ քամին։

Եթե առավոտյան հրշեջները հայտնում էին իրավիճակի կայունացման նշանների մասին, ապա ավելի ուշ օջախներից մեկը կրկին ակտիվացել է։ Մարման աշխատանքներին ներգրավված են տասնյակ մասնագետներ, անտառային ծառայություններ, հրշեջ տեխնիկա, ծանր ինժեներական տեխնիկա և ավիացիա։ Գործողությանը մասնակցում են ինչպես Գալիսիայի տարածաշրջանային իշխանությունները, այնպես էլ Իսպանիայի էկոլոգիական անցման նախարարությունը, որը ուղարկել է ամֆիբիա ինքնաթիռներ և ուղղաթիռ։

Հրդեհի պատճառով փակվել է երթևեկությունը Պադրոնի և Թեոյի շրջանների մի քանի ճանապարհներին։ Այս պահին տուժածների կամ բնակելի տների վնասման մասին տեղեկություններ չեն ստացվել, սակայն իշխանությունները պահպանում են բարձր պատրաստվածության մակարդակը՝ բնակավայրերին կրակի մոտ լինելու պատճառով։ Հրդեհը տեղի է ունեցել Գալիսիայում անտառային հրդեհների աճող մտահոգության ֆոնին։

Տարածաշրջանային իշխանություններն արդեն սահմանել են 2026 թվականի հրդեհավտանգության բարձր շրջանը՝ հուլիսից սեպտեմբեր, չբացառելով դրա երկարաձգումը մինչև հոկտեմբեր։

Մասնագետների գնահատմամբ, ներկայիս հրդեհն արդեն դարձել է տարածաշրջանում սեզոնի ամենալուրջ հրդեհներից մեկը։

Հետևեք մեզ՝ այստեղ