Ընդդիմությունը կհրաժարվի՞ մանդատներից. ընտրություններից հետո նոր պայքար է սկսվում

Ազգային ժողովի ընտրությունների նախնական և բավականին վիճահարույց արդյունքների հրապարակումից հետո քաղաքական օրակարգի գլխավոր հարցերից մեկը դարձել է ընդդիմադիր ուժերի հետագա քայլերը, մասնավորապես՝ արդյոք խորհրդարան անցած քաղաքական ուժերը կստանձնեն իրենց մանդատները, թե ոչ։

Սակայն հարկ է նշել, որ նման որոշումների համար դեռ ժամանակ կա, քանի որ ընտրությունների վերջնական արդյունքները Կենտրոնական ընտրական հանձնաժողովը կհրապարակի միայն հունիսի 14-ին։ Մինչ այդ սպասվում են ինչպես քաղաքական քննարկումներ, այնպես էլ արդյունքների բողոքարկման և վերահաշվարկի գործընթացներ։

Արդեն իսկ «Բարգավաճ Հայաստան» կուսակցությունը պահանջել է վերահաշվարկել քվեարկության արդյունքները։ Կուսակցության ներկայացուցիչների պնդմամբ՝ մի շարք տեղամասերում արձանագրվել են տվյալների խեղաթյուրումներ, ինչը, նրանց կարծիքով, կարող է վկայել հետընտրական գործընթացում ավելի լայնածավալ խնդիրների առկայության մասին և ազդել վերջնական թվերի վրա։

Ընտրությունների արդյունքները վիճարկելու պատրաստակամություն է հայտնել նաև «Հայաստան» դաշինքը։ Դաշինքի առաջնորդ, ՀՀ երկրորդ նախագահ Ռոբերտ Քոչարյանի խոսքով՝ ընտրություններն անցկացվել են վարչական ռեսուրսի լայն կիրառման, ընդդիմադիրների նկատմամբ ճնշումների, ձերբակալությունների և տարբեր ընտրախախտումների պայմաններում, ինչի հետևանքով իրենք պատրաստվում են իրավական ճանապարհով բողոքարկել արդյունքները։

Նմանատիպ դիրքորոշում է հայտնել նաև «Ուժեղ Հայաստան» դաշինքը։ Քաղաքական ուժի ներկայացուցիչների գնահատմամբ՝ հրապարակված տվյալները չեն կարող ամբողջությամբ արտացոլել քաղաքացիների իրական կամարտահայտությունը և պահանջում են մանրակրկիտ ուսումնասիրություն ու քաղաքական-իրավական գնահատական։ Դաշինքը ևս հայտարարում է, որ ընտրարշավի ընթացքում գործել է լուրջ ճնշումների և հետապնդումների պայմաններում։

Ընտրությունների հայտարարված արդյունքները մերժում է նաև «Միասնության թևեր» կուսակցությունը՝ դրանք համարելով ապօրինի և չարտացոլող քաղաքացիների իրական կամքը։ Կուսակցությունը տեղեկացրել է, որ նախաձեռնում է քվեարկության արդյունքների վերահաշվարկի գործընթաց և քննարկում է նաև արդյունքները դատական կարգով վիճարկելու հնարավորությունը։

Այսպիսով, նախնական արդյունքների հրապարակմամբ ընտրական գործընթացը դեռևս չի ավարտվում։ Ընդհակառակը, առաջիկա օրերին քաղաքական և իրավական զարգացումները կարող են էական ազդեցություն ունենալ վերջնական պատկերի վրա։

Ինչ վերաբերում է մանդատներ վերցնելու կամ հրաժարվելու հարցին, ապա այն հիմնականում քաղաքական որոշման տիրույթում է։ Իրավաբանների գնահատմամբ՝ իրավական առումով նման քայլը չի կարող փոխել ընտրությունների արդյունքները կամ դրանց իրավական ուժը։ Այդ թեմայի շուրջ քննարկումները առավել տրամաբանական կլինեն միայն վերջնական արդյունքների հրապարակումից հետո, քանի որ հնարավոր բողոքարկումներն ու վերահաշվարկները կարող են որոշակի փոփոխություններ մտցնել ներկայում հայտնի թվերի մեջ։

Ինչպես տեղեկացնում է Past.am-ը, ընտրական գործընթացի հետ կապված զարգացումները շարունակում են մնալ հանրային և քաղաքական ուշադրության կենտրոնում։

Մանրամասները՝ «Փաստ» օրաթերթի այսօրվա համարում