Դիմա Բիլանն ու Եվգենի Պլյուշչենկոն՝ Հայաստանում․ Ի՞նչ ելույթ է ունենալու Հայկոն

«Ֆորպոստարտ պրոդաքշընի» հիմնադիր և «Սառույցի թագավորները» նախագծի կազմակերպիչ Զառա Մխեյանը տեղեկացնում է, որ սառցե շոուի պրոդյուսեր Արի Զաքարյանը հատուկ Հայաստանի համար փոխել է նախագծի ձևաչափն ու ստեղծագործական միտքը:
Եվ այսպես, հատուկ հայ հանդիսականի համար շոուի հյուրն է հռչակավոր ջութակահար Էդվին Մարտոնը, ով նվագում է մեծանուն Անտոնիո Ստրադիվարիուսի՝ 1698 թվականին ստեղծված ջութակով, գրում է Wnews.am-ը: Հունգար նշանավոր կոմպոզիտորը հայտնի է դասական կոմպոզիցիաները և գերժամանակակից հնչողությունները միավորելու և յուրօրինակ մշակումներ կատարելու իր առանձնահատուկ տաղանդով: Հանրահայտ կոմպոզիտորը արժանացել է EMMY մրցանակի՝ աշխարհի հռչակավոր գեղասահորդների, օլիմպիական չեմպիոնների օլիմպիական ծրագրերի լավագույն երաժշտության համար. նրանց թվում են Եվգենի Պլյուշչենկոն, Տատյանա Տոտմյանինան, Մաքսիմ Մարինինը:
2008 թվականի մայիսին Էդվին Մարտոնն իր ընկերներ Եվգենի Պլյուշչենկոյի և Դիմա Բիլանի հետ հաղթեցին Եվրատեսիլում՝ 53 տարվա ընթացքում առաջին անգամ: Հատուկ Պլյուշչենկոյի համար տեղադրվել էր պլաստիկե սառույցի բեմ: Արդյունքում, նրանց կատարմամբ «Believe» բեմականացումը գրավեց 1-ին տեղը:

Եվ այսպես, Հայաստանում առաջին անգամ կներկայացվի այդ բեմական համարը՝ հոյակապ եռյակի կատարմամբ. Տասնամյակի ամենասիրված երգիչ Դիմա Բիլանը, ջութակահար Էդվին Մարտոնը, ով կպարգևի ձեզ ջութակի՝ առանց չափազանցության, յուրահատուկ հնչողություն. Նա առաջին իսկ նոտաներից կախարդում է բազմահազարանոց դահլիճներ և դիպչում յուրաքանչյուր ունկնդրի սրտին, և Ռուսաստանի տաղանդավոր գեղասահորդ Եվգենի Պլյուշչենկոն, ով դարձել է առաջին գեղասահորդը, ով մրցաշարերում իրականացրել է քառակի պտույտ ցատկ, եռակի պտույտ-ցատկ, եռակի հրում-ցատկ (2002 թվականի Ռուսաստանի գավաթ), տղամարդկանց շրջանում դարձել է առաջինը՝ կատարելով Բիլմանի պտույտը (պտույտ մեկ ոտքի վրա՝ երկրորդ ոտքը գլխավերևում), եռակի ակսել (երեքուկես պտույտ-ցատկ)-եռակի ֆլիպ ցատկ (2001).

Սա Հայաստանի պատմության մեջ իրադարձություն է: «Սառույցի թագավորները» սառույցը կվերափոխեն ոսկու. Նրանք՝ օլիմպիական ոսկե չեմպիոնները և «Ստրադիվարիուսի ոսկե սառույցը»:

Իսկ սիրված երգիչ Հայկոն, ով հեղինակել է «Գարեգին Նժդեհ» կինոնկարի երաժշտությունը, հայտնի ջութակահար Էդգար Հակոբյանի նվագակցությամբ կկատարի ֆիլմի սաունդթրեքը, որն իր հուզականությամբ կպարուրի գեղեցիկ երեկոն ջերմ զգացողություններով:

Մոլորակի թիվ մեկ «Սառույցի թագավորները» սառցե շոուն կկայանա 2016 թվականի մարտի 5-ին Կ. Դեմիրճյանի անվան մարզահամերգային համալիրում ժամը 19.00-ին:
Ծրագրին մասնակցում են. Եվգենի Պլյուշչենկոն, Իրինա Սլուցկայան, Բրիան Ժուբերը, Տոմաշ Վերները, Գև Մանուկյանը, հայտնի ջութակահար Էդգար Հակոբյանը, Վախթանգ Մուրվանիձեն, երգիչ Հայկոն, Սերգեյ Յակիմենկոն, Ջեյսոն Գրատցը, Հակոբ Մանուկյանը, Այդաս Ռեկլիսը և այլոք: