Թուրքիան կրկին ռմբակոծել է Սիրիայի քրդաբնակ շրջանները

Միջազգային հանրության կողմից հնչեցված մտահոգություններն անտեսելով՝ Թուրքիայի զինված ուժերը փետրվարի 16-ի առավոտյան կրկին կրակ են բացել Սիրիայի քրդերի «Ժողովրդավարական միություն» կուսակցության (PYD) դեմ: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը: Կրակոցներն արձակվել են T-155 «Փոթորիկ» անունն ունեցող հաուբիցներից:

Նման հարվածներ Սիրիայի տարածքի վրա հասցվել էին նաև փետրվարի 13-ին և 14-ին: Թուրքիայի վարչապետ Ահմեդ Դավութօղլուն պահանջել է PYD-ից դուրս բերել զինուժը թուրքական սահմանի հարակից շրջաններից:

Թուրքական կողմի այս հարձակումների քննադատությամբ է հանդես եկել ԱՄՆ պետդեպարտամենտը: Պետդեպի խոսնակ Ջոն Քիրբիի կողմից տարածած հաղորդագրության մեջ նշվում է, որ թուրքական զինված ուժերի կողմից քրդերի և Սիրիայի կառավարական ուժերի հրետանակոծումը հարուցել է ԱՄՆ-ի անհանգստությունը: «Մենք անհանգստացած ենք Հալեպից հյուսիս ընկած տարածքում առկա իրադրությամբ և մեր ջանքերն ենք գործադրում իրավիճակի լարվածությունը բոլոր կողմերից թուլացնելու նպատակով»,- ասել է Քիրբին՝ հորդորելով քրդերին ու թուրքերին կենտրոնացնել պայքարն ընդհանուր թշնամ ու՝ «Իսլամական պետություն» ահաբեկչական խմբավորման դեմ:

Թուրքիայի զինված ուժերի գործողությունների առնչությամբ մտահոգություն է հայտնել նաև ԵՄ արտաքին գործերի ու անվտանգության քաղաքականության գերագույն ներկայացուցիչ Ֆեդերիկա Մոգերինին: Նա պահանջել է անմիջապես դադարեցնել Սիրիայի տարածքի ռմբակոծությունը: