Գոշ Հակոբյանը բացում է իր առաջիկա նախագծերի փակագծերը․ «Մամա», «Զոնտիկ» և «Anubis»՝ երեք տարբեր աշխարհներ մեկ սեզոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Parie Media-ն «Մամա» մինի-սերիալով կբացի նոր սեզոնը:

Ռեժիսոր և պրոդյուսեր Գոշ Հակոբյանը Tert.am Life-ի հետ զրույցում պատմել է իր առաջիկա նախագծերի մասին՝ նշելով, որ գարնանային եթերաշրջանում հանդիսատեսին սպասվում են միանգամից մի քանի նոր աշխատանքներ։

Առաջինը կլինի «Մամա» մինի-սերիալը, որը նախատեսված է ութ սերիայից։ Նախագիծը կհեռարձակվի Հանրային հեռուստաընկերությամբ:

«Զոնտիկ»․ իրական պատմության հիման վրա նկարահանված ֆիլմ

Parie Media-ի հաջորդ նախագիծը «Զոնտիկ» գեղարվեստական ֆիլմն է, որը նրա դեբյուտն է մեծ խաղարկային կինոյի աշխարհում։

Ֆիլմը պատմում է խորհրդային ժամանակների ամենահայտնի բանկային կողոպուտներից մեկի մասին:

«1977 թվականին, Խորհրդային Հայաստանի մայրաքաղաք Երևանում տեղի ունեցավ ԽՍՀՄ պատմության ամենահամարձակ և աղմկահարույց բանկային կողոպուտն է:

Երկու եղբայրներ՝ Նիկոլայ Կալաչյանն ու Ֆելիքս Կալաչյանը, երկար ժամանակ ուսումնասիրել էին Պետական բանկի կանխիկ գումարի տեղափոխման համակարգը։ Գողության գործիքն անսպասելի էր բոլորի համար՝ մանկական անձրևանոց։

Գողությունը կատարվեց արագ և հաշվարկված ձևով․ հափշտակվեց մոտ 1.5 միլիոն խորհրդային ռուբլի, որը այն ժամանակվա համար հսկայական գումար էր։

Սկսվեց լայնածավալ հետաքննություն՝ ԿԳԲ-ի մասնակցությամբ։ Մի քանի ամիս անց եղբայրները ձերբակալվեցին, իսկ դատավարությունից հետո դատապարտվեցին մահապատժի։ Այս պատմությունը երկար տարիներ գաղտնի էր պահվում և հանրությանը հայտնի դարձավ միայն ԽՍՀՄ փլուզումից հետո»։

Ֆիլմում գլխավոր դերերում հանդես են գալիս Սոս Ջանիբեկյանը և Մոսո Կարապետյանը։

Ֆիլմը նախատեսվում է ցուցադրել մեծ էկրաններին ապրիլի 9-ից՝ ոչ միայն Հայաստանում, այլև արտերկրում։ Այն թարգմանվել է չորս լեզուներով՝ հայերեն, ռուսերեն, անգլերեն և ֆրանսերեն։

«Anubis»․ գիտաֆանտաստիկ փորձարարական նախագիծ

Երրորդ նախագիծը «Anubis» միկրոսերիալն է՝ վեց սերիայից բաղկացած գիտաֆանտաստիկ պատմություն։

Սյուժեն պատմում է խորհրդային ժամանակների գաղտնի լաբորատորիայի մասին, որտեղ դեռևս 1990-ականների սկզբին իրականացվում էին արհեստական բանականության փորձեր մարդկանց վրա։

«Պատմության կենտրոնում երիտասարդ հերոսն է, որը կյանքի ծանր իրավիճակում համաձայնվում է մասնակցել փորձին և հայտնվում է վիրտուալ աշխարհում։ Այնտեղ նա սիրահարվում է android աղջկա, և կանգնում ընտրության առաջ՝ վերադառնալ իրական կյանք, թե մնալ սիմուլյացիայի մեջ»,- մեզ հետ զրույցում պատմեց Գոշ Հակոբյանը:

Ֆիլմում գլխավոր հերոսին մարմնավորում է դերասան Սաշա Սուքիասյանը։

Գոշ Հակոբյանի խոսքով՝ մեկ սեզոնի ընթացքում միանգամից երեք նախագիծ ներկայացնելը երկար ժամանակ իր նպատակն էր։

Ռեժիսորը նշում է, որ ամբողջ թիմը շուրջ 8-9 ամիս անդադար աշխատել է՝ ամենօրյա ծանր գրաֆիկով։ Նրա խոսքով՝ հաջորդ նպատակն այն է, որ ընկերությունը կարողանա տարին երկու անգամ ներկայացնել միանգամից երեք նոր նախագիծ, որոնցից մեկը կլինի լիամետրաժ գեղարվեստական ֆիլմ։

Հետևեք մեզ՝ այստեղ