«Նոր տարվա կինո 2»․ սիրո և երազանքների մասին ֆիլմի նկարահանումները մեկնարկել են

ՄՇԱԿՈՒՅԹ 27 Փետրվար, 2026 20:35

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մեկնարկել են «Նոր տարվա կինո 2» գեղարվեստական ֆիլմի նկարահանումները։ Ֆիլմի ռեժիսորն է Ելենա Արշակյանը, սցենարի հեղինակը՝ Անահիտ Մխիթարյանը։

Ֆիլմը պատմում է դժվար օրերին ծնված, փորձություններ հաղթահարած մեծ սիրո մասին և ապացուցում, որ Նոր տարվա օրը պահած երազանքները անպայման կատարվում են: Շնորհակալության, սիրո և երազանքների մասին ֆիլմը խոստանում է նոր հերոսներ ու անակնկալներ:

Tert.am Life-ը ներկա է եղել ֆիլմի նկարահանումներին և զրուցել ստեղծագործական կազմի հետ։

«Հաջողված նախագծի շարունակությունը միշտ պարտավորեցնող է». Ելենա Արշակյան

Ռեժիսոր Ելենա Արշակյանի խոսքով՝ առաջին ֆիլմի հաջողությունից հետո շարունակությունը նկարահանելն առավել բարդ ու պատասխանատու է։

«Շատ դժվար է նկարահանել ֆիլմի շարունակությունը, երբ նախագիծն արդեն ունեցել է հաջողություն։ Դա պարտավորեցնող է։ Երկար ենք մտածել սցենարի շուրջ՝ ինչ անել, որ հանդիսատեսը ժպիտով հեռանա դահլիճից։ Կարծում եմ՝ գտել ենք մեր բանաձևը, բայց վերջնական խոսքը հանդիսատեսինն է»։

Ռեժիսորի խոսքով՝ գլխավոր հերոսուհու ընտրության հարցում երկար քննարկումներ չեն եղել։

«Երբ հասկացանք, թե ինչպիսին պետք է լինի մեր հերոսուհին, անմիջապես մտքովս անցավ Անի Երանյանը։ Չեմ կարող ասել, որ մեծ քասթինգներ ենք անցկացրել․ որոշեցինք ու զանգահարեցի նրան։ Նա մեծ սիրով համաձայնվեց և հատուկ այս նախագծի համար Հայաստանում է»։

Ռեժիսորը նշեց նաև, որ ֆիլմում նկարահանվելու համար Միացյալ Նահանգներից Հայաստան է ժամանել դերասանուհի Արմինե Պողոսյանը։

Խոսելով ֆիլմի բովանդակության մասին՝ Արշակյանը մանրամասներ չբացահայտեց, սակայն ընդգծեց գլխավոր ուղերձը. «ֆիլմը շնորհակալ լինելու մասին է: Իսկ թե ինչի համար՝ հանդիսատեսը կհասկանա ֆիլմը դիտելուց հետո»։

Նկարահանումներն ընթանում են Լոռու մարզում։

«Սկզբում որոշ դժվարություններ կային, բայց նկարահանման հրապարակ մտնելուց հետո ամեն ինչ հարթ ընթացավ։ Նույնիսկ ձյունն էր, կարծես, մեր պատվերով։ Փառք Աստծո, ամեն ինչ շատ լավ է ընթանում»։

Ֆիլմի պրեմիերան նախատեսված է նոյեմբերի 5-ին, որից հետո այն կցուցադրվի Երևանի կինոթատրոններում։

Ռեժիսորի խոսքով՝ թեև ֆիլմը հումորային է, այն ունի նաև կարևոր արժեքային շեշտադրումներ.

«Ես չեմ կարող պարզապես ծիծաղեցնելու համար ֆիլմ նկարել։ Ինձ համար կարևոր է ասելիքը։ Մենք փորձել ենք հանդիսատեսին փոխանցել մեր գաղափարը, և հույս ունեմ՝ էկրանից կկարողանանք դա հասցնել մարդկանց»։

«Ֆիլմը կարևոր արժեքների մասին է՝ սեր, բարություն, հայրենասիրություն». Մկրտիչ Արզումանյան

Ֆիլմում ավելի ծավալուն կերպարով կներկայանա նաև Մկրտիչ Արզումանյանը։

«Առաջին ֆիլմում կարճ մասնակցություն ունեի, իսկ այս անգամ կերպարս շարունակություն է ստացել։ Ամենաուրախալին այն է, որ խոսում եմ իմ հայրենի բարբառով։ Դա հեշտ չէ, որովհետև բարբառը պետք է ներկայացնել համով և բնական»,- նշեց դերասանը:

Նրա խոսքով՝ երկրորդ մասը կառուցվածքով և խորությամբ տարբերվում է առաջինից։

«Աշխատանքներն ավելի երկար են տևել, և դա զգացվում է։ Ֆիլմն ավելի իմաստային, հետաքրքիր, ուրախ և միաժամանակ հուզիչ է»։

Մկրտիչ Արզումանյանի հերոսը՝ Հովսեփ պապը ֆիլմում գտնում է իր երկրորդ կեսին՝ Ջուլիային։ «Շատ գեղեցիկ սիրային գիծ է։ Թվում է՝ իրար հետ կապ չունեցող մարդիկ են, բայց գտնում են միմյանց»։

Խոսելով ֆիլմի արժեքների մասին՝ Մկրտիչ Արզումանյանը նշեց. «Սեր, բարություն, ուշադրություն իրար հանդեպ, հայրենասիրություն։ Շատ բարի և ընտանեկան ֆիլմ է»։

«Չդադարե՛ք երազել». Անի Երանյան

Գլխավոր հերոսուհուն մարմնավորում է Անի Երանյանն, ով հատուկ այս նախագծի համար ժամանել է Հայաստան։ «Ելենա Արշակյանն առաջարկեց մասնակցել ֆիլմին։ Գրաֆիկի հետ կապված որոշ հարցեր կային, բայց ցանկությունը մեծ էր, և ես միացա նախագծին»։

Դերասանուհու խոսքով՝ իր կերպարը Միացյալ Նահանգներից ժամանում է Հայաստան՝ ամանորյա կարևոր իրադարձություններին մասնակցելու։«Կերպարի մասին շատ բան չեմ կարող բացահայտել, բայց ֆիլմը երազանքների մասին է։ Մարդիկ չպետք է դադարեն երազել։ Երազանքները նախ ձևավորում են կյանքը, հետո դու ես գնում դրանց հետևից»,- ամփոփեց Անին:

«Նոր տարվա կինո 2» ֆիլմի մյուս հերոսներին կբացահայտենք հաջորդիվ: