Քադաֆիի որդուն կհուղարկավորեն միայն իր ընտանիքի եւ երկու ցեղերի խորհուրդների ներկայությամբ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Լիբիայի նախկին առաջնորդ Մուամար Քադաֆիի որդու՝ Էզ-Զինթան քաղաքում սպանված Սեյֆ ալ-Իսլամի հուղարկավորությունը տեղի կունենա միայն նրա ընտանիքի եւ տեղական երկու ցեղերի ներկայացուցիչների ներկայությամբ։ Այս մասին հայտնել է Բենի Վալիդ քաղաքի անվտանգության ծառայության պաշտոնյան, որտեղ բերվել է Սեյֆ ալ-Իսլամի մարմինը։

«Հուղարկավորության արարողությանը եւ թաղմանը կմասնակցեն միայն նրա ընտանիքը եւ Լիբիայի երկու ցեղային խորհուրդների անդամները»,- ասել է պաշտոնյան, որի խոսքերը մեջբերել է Al Hadath հեռուստալիքը։ Նա ավելացրել է, որ սա վերաբերում է տեղական ամենամեծ ցեղերից մեկին՝ Վարֆալային, եւ Ալ-Քադաֆա ցեղին, որից սերել են ե՛ւ Սեյֆ ալ-Իսլամը, ե՛ւ նրա հայրը՝ Մուամար Քադաֆին։

Այժմ, Al Hadath-ի տվյալներով՝ Բենի Վալիդում, որը պատմականորեն Լիբիայում Քադաֆիի ընտանիքի աջակցության հիմնական կենտրոններից մեկն է, Սեյֆ ալ-Իսլամի հիշատակի աղոթքի նախապատրաստական ​​​​աշխատանքներն են ընթանում: Ինչպես ավելի վաղ հայտնել էին սպանվածի հարազատները, Քադաֆիի որդին կթաղվի այն գերեզմանատանը, որտեղ վերջին հանգրվանն են գտել նրա պապը եւ կրտսեր եղբայրը՝ Խամիսը (որը մահացել է 2011թ․):

Ջամահիրիայի առաջնորդի երկրորդ որդին՝ Սեյֆ ալ-Իսլամը, սպանվել է իր տանը փետրվարի 3-ին, 53 տարեկան հասակում: Նա որեւէ պետական ​​​​պաշտոն չի զբաղեցրել, բայց կարեւոր դեր է խաղացել արտաքին քաղաքականության բանակցություններում մինչեւ Մուամար Քադաֆիի ռեժիմի անկումը 2011թ․: Հոր մահից հետո Սեյֆ ալ-Իսլամը մահապատժի է դատապարտվել Լիբիայում, սակայն դատավճիռը հետագայում չեղյալ է հայտարարվել: Քադաֆիի որդին առաջադրվել է նախագահի պաշտոնում 2021թ․, երբ երկիրը փորձել է անցկացնել ընդհանուր ընտրություններ: Մինչ օրս Լիբիայում ո՛չ խորհրդարանական, ո՛չ էլ նախագահական ընտրություններ չեն անցկացվել:

Հետևեք մեզ՝ այստեղ