Կատարում է թուրքական հետախուզական ծառայությունների վաղեմի ցանկությունն ու կամքը. «Փաստ»

«Փաստ» օրաթերթը գրում է.

politnavigator.news–ը «Փորձագետ. Փաշինյանը, կատարելով թուրքական հետախուզական ծառայությունների հրամանները, փորձում է իր վերահսկողության տակ գտնվող մինի-եկեղեցի ստեղծել» վերնագրով հոդվածում գրում է, որ Նիկոլ Փաշինյանը կատարում է թուրքական հետախուզական ծառայությունների վաղեմի ցանկությունն ու կամքը՝ փորձելով վերացնել Հայ առաքելական եկեղեցին և ստեղծել կրոնական կազմակերպություն իր վերահսկողության տակ։ Այս մասին հայտարարել է արևելագետ Սեմյոն Բաղդասարովը Alpha News-ի տեսաբլոգում։

Բաղդասարովի խոսքով, Փաշինյանի մեղադրանքները կաթողիկոս Գարեգին Բ-ի դեմ թուրքական արմատներ ունեն։ «Այս գործողությունները Փաշինյանի հորինածը չեն։ Նա կատարում է թուրքական հետախուզական ծառայությունների կամքը։ 1980-ականներին Թուրքիայի ուղղությամբ աշխատելիս ես ծանոթացել եմ որոշակի փաստաթղթերի, որոնք ցույց էին տալիս, որ թուրքական հետախուզական ծառայությունները պլանավորում էին լուծել հայ ժողովրդին վերաբերող մի շարք խնդիրներ՝ հայերի լիակատար ոչնչացմամբ։ Նրանք այն ժամանակ չէին կարող աշխատել Հայկական ԽՍՀ-ում մի շարք պատճառներով, բայց ակտիվորեն փորձում էին աշխատել Սփյուռքի որոշակի շրջանակներում և էվոլ յուցիոն դաշտում պարբերաբար տարբեր սադրանքներ էին իրականացնում։ Երկրորդ նպատակը հայ ժողովրդի՝ պատմական Հայաստանի նկատմամբ հիշողության մերժումն էր։ Եվ երրորդը՝ Հայ առաքելական եկեղեցու ոչնչացումը, որը միշտ էլ նշանակալի դեր է խաղացել հայ ժողովրդի պատմության մեջ՝ հատկապես պետականության կորստից հետո, և ծառայել է որպես կապող օղակ տասնյակ երկրներում ցրված հայ ժողովրդի սփյուռքի միջև։ Հետևաբար, Փաշինյանը և նրա թիմը կատարում են թուրքական հետախուզական ծառայությունների ցանկությունները», - նշել է նա։

Ըստ փորձագետի, Փաշինյանը հատկապես ակտիվացել է Անկարա կատարած իր անպարկեշտ այցից հետո, որտեղ հանդիպեց Էրդողանի հետ։ «Այսինքն, ժամանակը եկել է, դա՝ ըստ թուրքերի և նրանց ետևում կանգնածների՝ բրիտանացիների և ամերիկացիների, քանի որ պատմականորեն Թուրքիան է միշտ խաղացել Արևմուտքի առաջամարտիկի դերը Ռուսաստանի և հայ ժողովրդի դեմ գործողություններում։ Հետևաբար, նա որոշեց գնալ և փոխել Գարեգին Բ կաթողիկոսին, չնայած նա դրա իրավունքը չունի, քանի որ Հայ եկեղեցին անջատ է պետությունից, իսկ Հայ առաքելական եկեղեցու կանոնադրության համաձայն, Կաթողիկոսը ցմահ է ընտրվում Գերագույն եկեղեցական խորհրդի կողմից։ Բայց նա պարզապես ցանկանում է ջախջախել նրանց և ստեղծել պետական եկեղեցի, մինի– եկեղեցի, որը կգործի միայն Հայաստանում և կենթարկվի իրեն», հայտարարել է Բաղդասարովը։

Մանրամասները՝ «Փաստ» օրաթերթի այսօրվա համարում