Գազայի հատվածում իսրայելական գրոհների հետեւանքով զոհված պաղեստինցիների թիվը գերազանցել է 70 000-ը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Գազայի առողջապահության նախարարությունը շաբաթ օրը հայտնել է, որ Իսրայելի եւ պաղեստինյան ՀԱՄԱՍ խմբավորման միջեւ երկու տարուց ավելի տեւած պատերազմի սկսվելուց ի վեր զոհվել է ավելի քան 70 հազար մարդ, հաղորդել է AFP-ն։

Գազայի առողջապահության նախարարությունը հայտարարության մեջ նշել է, որ պատերազմի զոհերի թիվը հասել է 70 հազար 100-ի։ Նախարարությունը հայտնել է, որ հոկտեմբերի 10-ին հրադադարի համաձայնագրի ուժի մեջ մտնելուց հետո իսրայելական գնդակոծությունների հետեւանքով զոհվել է 354 պաղեստինցի։

Նախարարության տվյալներով՝ վերջին 48 ժամվա ընթացքում Գազայի հատվածի հիվանդանոցներ է տեղափոխվել երկու դի, որոնցից մեկը հայտնաբերվել է փլատակների տակ։ Նշվել է, որ զոհերի վերջին թվի համեմատ կտրուկ աճը պայմանավորված է նրանով, որ իշխանությունները 299 դիերի վերաբերյալ տվյալները մշակել եւ հաստատել են։

Չնայած հրադադարին՝ պաղեստինյան տարածքը շարունակում է մնալ խոր հումանիտար ճգնաժամի մեջ։

Գազայի պատերազմը սկսվել է ՀԱՄԱՍ-ի կողմից Իսրայելի վրա 2023թ․ հոկտեմբերի 7-ին իրականացված հարձակումով, որի հետեւանքով զոհվել է 1 221 մարդ։ Այդ օրը զինյալները Գազայում առեւանգել են 251 մարդու։ Վերջին հրադադարի ժամանակ զինյալները պահում էին 20 կենդանի պատանդ եւ 28 դիակ։

Այդ ժամանակվանից ՀԱՄԱՍ-ը ազատ է արձակել բոլոր կենդանի պատանդներին եւ վերադարձրել 26 մահացած պատանդների մնացորդները: Դրա դիմաց Իսրայելը ազատ է արձակել գերության մեջ գտնվող գրեթե 2 000 պաղեստինցի բանտարկյալների եւ վերադարձրել հարյուրավոր մահացած պաղեստինցիների մարմիններ:

Հետևեք մեզ՝ այստեղ