Սոպրանո՝ ում ձայնը միավորում է նրբությունը և ուժը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երեւանի Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնի առաջատար մեներգչուհիներից մեկը՝ սոպրանո Սիլվա Պետրոսյանը, այն անուններից է, որոնք այսօր մարմնավորում են հայ օպերային արվեստի նոր, երիտասարդ, բայց արդեն կայացած դեմքը։ Նրա բեմական ներկայությունն ու ձայնային հզորությունը ներդաշնակորեն միահյուսվում են նրբության, զգայականության եւ խորունկ արտահայտչականության հետ՝ ստեղծելով արվեստի յուրահատուկ ամբողջություն։

Ավելի քան տասը տարի Սիլվա Պետրոսյանը մշտապես հանդես է գալիս թատրոնի խաղացանկային ներկայացումներում՝  մարմնավորելով գլխավոր դերերգեր,  որոնք առանձնանում են երաժշտական եւ դերասանական բարձր կատարմամբ։

 

Նրա առաջին քայլերն օպերային արվեստում կապված են Երիտասարդական օպերային ծրագրի հետ (ղեկավար՝ Լեւոն Ջավադյան)։ Այդ ծրագրում երիտասարդ երգչուհին աչքի ընկավ իր տեմբրի յուրահատկությամբ եւ բեմական ազատությամբ։ Հենց այդ շրջանում էլ Սիլվա Պետրոսյանը առաջին անգամ ներկայացավ հանդիսատեսին՝ մարմնավորելով Կարինեի կերպարը  (Տ. Չուխաջյան «Կարինե» օպերետ)՝ ստեղծելով վառ, կանացի եւ կենդանի հերոսուհու։ Հետագայում նույն դերերգով Սիլվան հանդես եկավ նաեւ միջազգային բեմում՝ 2017 թվականին Ստոկհոլմում կայացած ICVT միջազգային կոնգրեսի շրջանակում։

Ավարտելով Երեւանի Կոմիտասի անվան պետական կոնսերվատորիան՝ պրոֆեսոր Սուսաննա Մարտիրոսյանի դասարանը, Սիլվա Պետրոսյանը շատ կարճ ժամանակում հաստատվոց որպես օպերային թատրոնի մշտական եւ պահանջված մեներգչուհիներից մեկը։

Նրա դերերգերի ցանկը լայն ու բազմազան է.

Միմի (Պուչչինի «Բոհեմ»),

Վիոլետա Վալերի (Վերդի «Տրավիատա»),

Լիու (Պուչչինի «Տուրանդոտ»),

Չիո Չիո Սան / Մադամ Բաթերֆլայ (Պուչչինի «Մադամ Բաթերֆլայ»),

Միքաելա (Բիզե «Կարմեն»),

Սոմա (Տերտերյան «Սոմա»),

Սյուզան Վալադոն (Ազնավուր «Լոտրեկ»),

վերջերս՝ Դեզդեմոնա (Վերդի «Օթելլո») եւ շարքը դեռ անվերջ կարելի է թվել։

Յուրաքանչյուր դերում նա սերտորեն միավորում է իր ներաշխարհի խորությունը եւ բեմական ճշմարտացիությունը՝ ստեղծելով կերպարներ, որոնք հանդիսատեսը հիշում է երկար։

Բեմական հաջողություններին զուգահեռ՝ Սիլվա Պետրոսյանը բազմաթիվ մրցույթների դափնեկիր է։ Նրա մրցանակների շարքում առանձնանում է «Կոմիտասի լավագույն կատարման համար» ստացած մրցանակը, որին երգչուհին արժանացել է Տաթեւիկ Սազանդարյանի եւ Պավել Լիսիցյանի անվան մրցույթում՝ Կոմիտասի ստեղծագործության կատարումով գերելով ժյուրիի անդամներին։

Շուտով հաջորդեցին նաեւ միջազգային հաջողություններ. այդ թվում՝ «Vox Artist Moscow» հարթակի դափնեկրի մրցանակը, որը հաստատեց նրա միջազգային ճանաչման սկիզբը։

Սիլվա Պետրոսյանը պարբերաբար հանդես է գալիս արտասահմանյան բեմերում՝ ներկայացնելով հայկական օպերային արվեստը տարբեր երկրների հանդիսատեսին։

2022 թվականին նա մասնակցեց RCF մշակութային փոխանակման ծրագրին, որի շրջանակում ելույթներ ունեցավ ԱՄՆ-ի մի շարք նահանգներում, այդ թվում ՝ Օհայոյում, Ֆլորիդայում, Միչիգանում, Վաշինգտոնում, Նյու Յորքում։ Սիլվա Պետրոսյանը ելույթ է ունեցել նաեւ Ռուսաստանում, Հունաստանում, Վրաստանում եւ այլ երկրներում։

Հատկանշական է նաեւ 2023 թվականին Սանկտ Պետերբուրգի Միխայլովսկի թատրոնում կայացած գալա համերգը՝ նվիրված Արամ Խաչատրյանի ծննդյան 120-ամյակին, որտեղ Սիլվա Պետրոսյանը հանդես եկավ տեղի նվագախմբի հետ՝ մաեստրո Կարեն Դուրգարյանի ղեկավարությամբ։

Նա բազմիցս համագործակցել է Հայաստանի առաջատար դիրիժորների հետ՝ հանդես գալով ինչպես օպերային, այնպես էլ գալա համերգների բեմերում՝ ելույթ ունենալով համաշխարհային ճանաչում ունեցող հայ երաժիշտների՝ ջութակահար Սերգեյ Խաչատրյանի, թավջութակահար Նարեկ Հախնազարյանի եւ այլոց հետ։

Սիլվա Պետրոսյանը բեմում մշտապես հավատարիմ է մնացել իր գլխավոր սկզբունքին. այն է՝ յուրաքանչյուր դերում բացահայտել մարդկային ճշմարտությունը։ Նրա ձայնն ու ներկայությունը բեմում հիշեցնում են, որ իսկական օպերան ապրում է ոչ միայն նոտաների, այլեւ մաքուր զգացմունքի ու հոգու միջոցով։

Նանիկ Աղասյան

Հետևեք մեզ՝ այստեղ