«Թանկարժեք տղաները». Արշո Հարությունյանի թանկարժեք ֆիլմի պրեմիերան, հայտնի հյուրերն ու հետաքրքիր դրվագները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Նոյեմբերի 6-ին «Կինոմոսկվա»-ում կայացավ ռեժիսոր Արշո Հարությունյանի «Թանկարժեք տղաները» ֆիլմի պրեմիերան, որը ստեղծվել է «Sharm Holding»-ի և «Mitoyan Production»-ի համատեղ արտադրությամբ։ Ֆիլմի սյուժեն սկսվում է 17 տարի առաջ՝ երբ անսպասելի խառնաշփոթի արդյունքում, ծննդատանը տեղերով փոխվում են երկու նորածիններ։ 

Tert.am Life-ը առանձնացրել է երեկոյի հետաքրքիր դրվագները:

 

Ծնողները, չիմանալով այդ մասին, մեծացնում են երեխաներին որպես սեփական որդիներ։ Տղաներից մեկը մեծանում է հաջողակ բիզնեսմեն Բաբկեն Դարբինյանի (Խորեն Լևոնյան) ընտանիքում, իսկ մյուսի «հայրը»՝ Մովսես Դարբինյանը (Մկրտիչ Արզումանյան), նրա հակապատկերն է։

Արկածախնդիր և անպատասխանատու Մոսոն կուտակել է մեծ պարտքեր ու իր ընտանիքը հասցրել է աղքատության։ Սակայն մի օր նա բացահայտում է, որ իր որդին՝ Ավետը, իր կենսաբանական որդին չէ։ Այս բացահայտումը ցնցում է երկու ընտանիքներին՝ ստիպելով վերաիմաստավորել տարիներ շարունակ կառուցված կյանքի հիմքերը։

Ռեժիսոր Արշո Հարությունյանի խոսքով՝ «Թանկարժեք տղաներ»-ի ստեղծագործական թիմը իր երազանքների կազմն էր. «Դերասանական հարմոնիան հրաշալի է ստացվել, հավատում ես զույգերին։ Այս արտիստներին նոր գույներով կտեսնի հանդիսատեսը։ Մկրտիչ Արզումանյան և Խորեն Լևոնյան տանդեմը շատ հետաքրքիր է՝ երկու ծայրահեղ տարբեր, բայց հզոր էներգետիկայով դերասաններ են։ Թամարայի հետ առաջին անգամ աշխատեցի՝ ստացվեց հրաշալի համագործակցություն, Լուիզայի հետ մեծ փորձ ունեի, բայց նա միշտ նոր շերտեր է բացում։ Իսկ երիտասարդ դերասանները՝ Ալեքսանդր Արզումանյանը և Սուրեն Ղազարյանը, ամեն բան արեցին մեծ պրոֆեսիոնալիզմով։ Առհասարակ, թե կադրում, թե կադրից դուրս, բոլորը իրենց գործին նվիրյալներն էին։ Ոչինչ պարզապես այնպես չէր արվում»։ 

Ֆիլմում հանդես են եկել Մկրտիչ Արզումանյանը, Խորեն Լևոնյանը, Լուիզա Ներսիսյանը, Թամարա Պետրոսյանը, Ալեքսանդր Արզումանյանը, Սուրեն Ղազարյանը և այլք։ Ֆիլմի  բեմադրող ռեժիսորը Արշո Հարությունյանն է, սցենարի հեղինակները՝ Աշոտ Աբրահամյանը, Ռուբեն Ջաղինյանը: Բեմադրող օպերատորը Սուրեն Թադևոսյանն է: Երաժշտություն հեղինակ՝ Արման Պարսամյան, սաունդթրեք՝ Ռոլանդ Գասպարյան: Ֆիլմի պրոդյուսերը Արման Միտոյանն է, գլխավոր պրոդյուսերը՝ Ռուբեն Ջաղինյանը:

Հավելենք, որ հայկական ցուցադրությանը նոյեմբերի 16-ին՝ ԱՄՆ AGBU կենտրոնում, կհաջորդի ամերիկյան պրեմիերան, որին ներկա կլինեն ռեժիսոր Արշո Հարությունյանը, գլխավոր դերակատար Խորեն Լևոնյանը, պրոդյուսեր Արման Միտոյանը, ինչպես նաև «Անհայտ բաժանորդ» ֆիլմի/ ներկայացման սիրելի դերասանները։ 

Հետևեք մեզ՝ այստեղ