Գերմանիան Ուկրաինային է փոխանցել խոստացված Patriot համակարգերը. Զելենսկի

«Մենք ամրապնդել ենք Patriot-ների բաղադրիչը մեր ուկրաինական հակաօդային պաշտպանության մեջ։ Ես շնորհակալ եմ Գերմանիային և անձամբ կանցլեր Ֆրիդրիխ Մերցին ռուսական ահաբեկչությունից կյանքերը պաշտպանելու մեր այս համատեղ քայլի համար», - ընդգծել է նա։

Ուկրաինայի նախագահը նշել է, որ երկրները որոշ ժամանակ պատրաստել են հակաօդային պաշտպանության այս ուժեղացումը, և այժմ պայմանավորվածությունները կատարված են։

«Ռուսաստանի օդային հարվածները Պուտինի գլխավոր խաղադրույքն են այս պատերազմում, հենց ահաբեկչությամբ է նա ցանկանում փոխհատուցել գետնի վրա իր խելահեղ նպատակներին հասնելու անկարողությունը», - ասել է Զելենսկին։

Ուկրաինայի ղեկավարը հավելել է, որ հակաօդային պաշտպանության յուրաքանչյուր ուժեղացում Ուկրաինային ավելի է մերձեցնում պատերազմի ավարտին։ Նա ընդգծել է, որ «որքան քիչ հաջողություններ ունենա ագրեսոր երկիրը, այնքան մեծ կլինի նրա դրդապատճառը՝ ավարտելու պատերազմը»։

«Մեր գործընկերների հետ միասին մենք շարունակում ենք աշխատել հակաօդային պաշտպանության հուսալի համակարգի կառուցման ուղղությամբ։ Եվ մեր կարողությունները կկարողանան երաշխավորել ոչ միայն Ուկրաինայի, այլև մեր գործընկերների անվտանգությունը, երբ դա անհրաժեշտ լինի», - հայտարարել է Ուկրաինայի նախագահը։

Զելենսկին նշել է, որ ՀՕՊ-ի հետագա ուժեղացման շուրջ բանակցությունները շարունակվում են։ Դրանք տեղի են ունենում ինչպես կառավարությունների մակարդակով, այնպես էլ անմիջապես համակարգերի արտադրողների հետ։

Գերմանիան հայտարարել էր, որ մտադիր է 2025 թվականի օգոստոսի սկզբին Բունդեսվերի պահեստներից Ուկրաինային Patriot-ներ փոխանցել, խոսքը երկու համակարգի մասին էր։ Մատակարարումն իրականացվել է Դանիայի, Լիտվայի և Նորվեգիայի ֆինանսական աջակցությամբ։

«Վճռորոշների կոալիցիայի» նիստի ժամանակ Զելենսկին կոչ է արել ԵՄ երկրներին Ուկրաինային Patriot ՀՕՊ համակարգեր տրամադրել։ Ըստ նրա, Կիևը դրանք կվերադարձնի Միացյալ Նահանգներից ստանալուն պես։

Հետևեք մեզ՝ այստեղ