ՔՊ-ն մոլորեցնում է հանրությանն ու իր կուսակցականներին

Իշխող «Քաղաքացիական պայմանագիր» կուսակցությունը ներկայացրել է նախընտրական ցուցակում ընդգրկվելու գործընթաց, որն ըստ վերլուծաբանների՝ ավելի շատ հիշեցնում է հանրության մոլորեցնելու և կուսակցական բյուջե լցնելու մեխանիզմ։ Նախօրոք տարածված պաշտոնական հաղորդագրության համաձայն, կուսակցությունից առաջադրվել ցանկացողները կարող են ինքնառաջադրվել նոյեմբերի 1–ից 30-ը՝ կուսակցության էլեկտրոնային հասցեին ուղարկելով ինքնակենսագրական։ Չկուսակցականներին անհրաժեշտ է նաև ստանալ վարչության առնվազն մեկ անդամի երաշխավորությունը։

ՔՊ ցուցակում ընդգրկվելու համար պահանջվում է վճար. կուսակցականները վճարում են 500 հազար դրամ, ոչ կուսակցականները՝ 1,5 միլիոն դրամ։ Սակայն վճարելը չի երաշխավորում ցուցակում հայտնվելը կամ անցողիկ համար ստանալը։ Վերլուծաբանների գնահատմամբ՝ այս մեխանիզմը ծառայում է երկու նպատակին՝ ցույց տալու կուսակցության ֆինանսական ներգրավվածությունը և յուրացնել դիմորդների վճարները՝ կազմելով նախընտրական բյուջե։ Նրանց տեղեկություններով, մի շարք դիմորդներ ստիպված են լինում վճարել նաև լրացուցիչ «ստվերային» գումարներ՝ ցուցակում ընդգրկվելու համար։

Կուսակցության ղեկավար մարմինը որոշում է, թե ով կանցնի նախնական «քաստինգը», իսկ վերջնական ցուցակը ձևավորվում է գարնանը կայանալիք համաժողովում քվեարկության միջոցով։ Վերլուծաբանների կարծիքով, սա ևս մեկ ձև է հանրությանը մոլորեցնելու՝ իրականում ցուցակը վերևից վար ձեւավորվում է Նիկոլ Փաշինյանի և նրա հովանավորների կողմից։

Անի Բադալյան