Փոքր տարածության մեջ մեծ երազանքների իրականացում. Հրազդանի նորաստեղծ թատրոնում պատրաստվում են պրեմիերայի

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հրազդանում գտնվող Կոստան Զարյանի անվան արվեստի դպրոցի շենքում բացվել է «Հրազդանի կամերային թատրոնը», որտեղ փոքր բեմը դառնում է մեծ երազանքների իրականացման միջավայր:

Թատրոնի հիմնադիր, դերասան Շահեն Փանոսյանը Tert.am Life-ի հետ զրույցում պատմել է, թե  ինչպես իր և գործընկերների տարիների երազանքը դարձավ իրականություն:

«Արդեն մի քանի տարի է՝ բացել ենք մասնավոր թատրոն, որը կունենա հատուկ դիմագիծ, հատուկ խոսք ու հատուկ պահանջներ։ Այն ժամանակակից դետալներ է պարունակում և հասարակության մեջ նոր հետաքրքրություններ կառաջացնի։ Սա մեր երազանքն էր, և հիմա այն իրականացավ»,- պատմեց Շահեն Փանոսյանը:

Թատրոնի առաջին ներկայացումը՝ «Շտապիր սիրել» մելոդրաման է, որի ռեժիսորը Արմեն Մարգարյանն է։ Ներկայացումը՝ պայմանական, փորձարարական ու ժամանակակից լուծումներով, արտահայտում է նորաստեղծ թատրոնի գաղափարախոսությունը: Ներկայացումները հաճախ կլինեն մոնո կամ փոքր կազմով՝ մատչելի և ինտիմ:

«Մենք ներկայացումները պահելու ենք փոքր ու պարզ ձևաչափում՝ փորձարարական, երաժշտական, գունային լուծումներով: Կարևորը ոչ թե ծախսատարությունն է, այլ ասելիքը: Թատրոնը կրելու է «կամերային» անվանումը, ինչը մեր գաղափարախոսության խորհրդանիշն է՝ փոքր տարածության մեջ մեծ երազանքների իրականացում»,- ընդգծեց Շահեն Փանոսյանը:

Էլեն Գևորգյանն, ով մարմնավորում է ներկայացման գլխավոր հերոսուհուն, առաջին անգամ է բեմ բարձրանում հասուն տարիքում․ «Սկզբում շատ էի լարվում։ Գլխավոր դերն է, և ես մտածում էի՝ գուցե չստացվի։ Բայց փորձերը մեծ ոգևորությամբ անցան։ Իմ կերպարը Սառան է՝ կյանքով լի, խենթ, բայց միևնույն ժամանակ շատ իմաստուն աղջիկ։ Ես զգում եմ, որ շատ բան եմ սովորում Սառայից․ երբեմն ինքս ինձ հարցնում եմ՝ այս իրավիճակում Սառան ինչ կաներ»:

Դերասանուհին խոստովանում է, որ պրեմիերայից առաջ դեռևս ունի պատասխանատվության զգացում, բայց վախը հաղթահարել է՝ շնորհիվ խաղընկերների ու ռեժիսորի վստահության։

Հայկ Պետրոսյանն, ով մարմնավորում է գլխավոր հերոսին, ևս շեշտում է նոր բեմի կարևորության մասին․

«Շատ ուրախ եմ, որ մարզում մեր առաջին քայլերն ենք անում:  Երևանում մշակութային կյանքը շատ ակտիվ է, բայց մարզերը դրա կարիքը շատ ունեն: Ներկայացման մեջ ամենահետաքրքիրը ռեժիսորական առանցքային գիծն է, որը մեզ ստիպում է ավելի խորքային մոտենալ կերպարներին՝ ոչ միայն ներկայացնելով մարդկային փոխհարաբերություններ, այլև ներառելով փիլիսոփայական շերտեր»:

Հայկ Պետրոսյանը նշում է, որ պրեմիերայից առաջ լարվածություն կա, բայց դա հաճելի հուզմունք է․

 «Դա այն բացառիկ զգացողությունն է, երբ առաջին անգամ հանդիսատեսը պիտի տեսնի քո աշխատանքը. դա սարսափեցնող չէ, այլ մեծ հաճույք»:

Հրազդանի կամերային թատրոնը նպատակ ունի մարզային մշակութային կյանքը հարստացնել և թատրոնը դարձնել հասանելի ու հետաքրքիր հասարակության լայն շերտերի համար: Շահեն Փանոսյանը նշում է․ «Մեր երազանքը ոչ միայն իրականություն դարձավ, այլև իրագործվեց հենց Հրազդանում: Սա պիտի դառնա բեմ, որտեղից կծնվեն նոր գաղափարներ և նոր երազանքներ»:

Հետևեք մեզ՝ այստեղ