Պուտինի հետ ոչ մի «նուրբ խաղ» Եվրոպային անվտանգություն չի երաշխավորում․ Տուսկ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ուկրաինայում ընթացող պատերազմի վերջին օրերն ու շաբաթները հստակ ցույց են տալիս, որ Ռուսաստանի նախագահ Վլադիմիր Պուտինի և Ռուսաստանի հետ որևէ զիջում կամ «նուրբ խաղ» հաջողության չի բերի և անվտանգության երաշխիք չի ապահովի, հայտարարել է Լեհաստանի վարչապետ Դոնալդ Տուսկը՝ Բելառուսի սահմանին Եվրահանձնաժողովի նախագահ Ուրսուլա ֆոն դեր Լայենի հետ համատեղ մամուլի ասուլիսի ժամանակ, հաղորդում է RMF 24-ը։

«Լեհաստանը, Եվրոպան, ՆԱՏՕ-ն և ԱՄՆ-ը պետք է, ինչպես 45 տարի առաջ, լինեն վճռական, հաստատակամ և համերաշխ այս «չարի կայսրության» նոր տարբերակի դեմ։ Բավական են զիջումները, պետք է լինել կոշտ և լավ պատրաստված», – ասել է Տուսկը։

Վարչապետը նշել է, որ Լեհաստանը ակնկալում է լուրջ մասնակցություն անվտանգության ամրապնդմանն ուղղված եվրոպական ծրագրերի ֆինանսավորման բաշխմանը, այդ թվում՝ SAFE ծրագրի։

Ըստ նրա, հաջորդ տարի Լեհաստանը 200 միլիարդ զլոտի է ներդնելու պաշտպանության, պաշտպանական արդյունաբերության և բանակի ոլորտներում։ «Մենք լրջորեն ենք վերաբերվում մեր պարտականություններին և նույն լրջությունը սպասում ենք Եվրոպայի բոլոր ինստիտուտներից և երկրներից՝ արևելյան սահմանի անվտանգության հարցերում և ագրեսորի ու Ռուսաստանի նկատմամբ կոշտ դիրքորոշման հարցում», – ասել է Տուսկը։

Նրա կարծիքով, Եվրահանձնաժողովի նախագահի ներկայությունը լեհ-բելառուսական սահմանին հաստատում է, որ անվտանգությունը եվրոպական գլխավոր առաջնահերթությունն է։

Տուսկը հավելել է, որ «չնայած երկարափող զենքով բելառուս զինվորների հայտնվելուն՝ ասուլիսը կայացել է՝ ցույց տալով եվրոպական վճռականությունն ու զիջումների նկատմամբ զրոյական պատրաստակամությունը»։

 Հետևեք մեզ՝ այստեղ