Ջերմատնային տնտեսությունների զարգացման աջակցության ծրագրի՝ բյուջեից ծախսերի կրճատում է նախատեսվում. «Փաստ»

«Փաստ» օրաթերթը գրում է․

Էկոնոմիկայի նախարարությունն առաջարկում է փոփոխություններ կատարել կառավարության 2023 թվականի հուլիսի 27-ի N 1284-Լ որոշման մեջ։ Նշվում է, որ Հայաստանում ջերմատնային տնտեսությունների զարգացման աջակցության ծրագրի շրջանակում կնքվել է 12 պայմանագիր՝ 46,2 հա տարածքով ջերմատնային տնտեսություններ հիմնելու նպատակով։ Միայն 2025 թվականին՝ հուլիսի 31-ի դրությամբ, կնքվել է 8 պայմանագիր՝ 30,9 հա տարածքով ջերմատնային տնտեսություններ հիմնելու նպատակով։ Ծրագրով արդյունքային ցուցանիշ է սահմանվել շուրջ 35 հա ընդհանուր մակերեսով արդիական պահանջներով ջերմատնային տնտեսությունների կառուցումը, որն արդեն իսկ գերազանցվել է։ Ծրագրի գործողության անցած ժամանակահատվածի արդյունքներով պայմանավորված՝ առաջացել է գործընթացը կարգավորելու անհրաժեշտություն։ Մասնավորապես՝ շինարարության ավարտական ակտը և դրա հիման վրա իրականացված պետական գրանցումը հաստատող անշարժ գույքի սեփականության կամ հողամասի կառուցապատման իրավունքի պետական գրանցման վկայականի պատճենը և այլ փաստաթղթերը ներկայացնելու համար ջերմատան կառուցման աշխատանքների համար ծրագրով սահմանված ժամանակահատվածից հետո շահառուներին լրացուցիչ ժամանակ տրամադրելը։

Նախագծով առաջարկվում է նվազեցնել յուրաքանչյուր շահառուին տրամադրվող վարկի տոկոսադրույքի սուբսիդավորման չափը՝ հաշվի առնելով ծրագրով սահմանված ցուցանիշի գերազանցումը և դիմումների մեծ թիվը, ինչպես նաև հստակեցվում է ծրագրի շրջանակում շինարարության ավարտից հետո շահառուի կողմից ներկայացվող փաստաթղթերի ժամանակահատվածը։ Մասնավորապես՝ նախագծով հնարավորություն է տրվում շահառուներին շինարարության ավարտական ակտը և դրա հիման վրա իրականացված պետական գրանցումը հաստատող անշարժ գույքի սեփականության կամ հողամասի կառուցապատման իրավունքի պետական գրանցման վկայականի պատճենը և այլ փաստաթղթերը ներկայացնել ջերմատան կառուցման աշխատանքների համար ծրագրով սահմանված ժամանակահատվածից հետո 20 աշխատանքային օրվա ընթացքում։ Միաժամանակ, ծրագրի բոլոր շահառուների համար հավասար պայմաններ ապահովելու նպատակով նախագծով նշված դրույթին տրվում է հետադարձ ուժ։

Այս նախագծի ընդունման կապակցությամբ 2026 թվականի պետական բյուջեի ծախսերում նախատեսվում է շուրջ 151,4 մլն դրամի նվազեցում։ Նախագծի ընդունմամբ ակնկալվում է այս ծրագրի բյուջեի ծախսերի կրճատում, որը կուղղվի գյուղատնտեսական ոլորտի այլ աջակցության ծրագրերի իրականացմանը։

Մանրամասները ՝ «Փաստ» օրաթերթի այսօրվա համարում