Եռաժամ հանդիպում Իսրայելում՝ Գազայի շուրջ. Նեթանյահուն օկուպացիայի՞ է պատրաստվում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իսրայելի վարչապետ Բենիամին Նեթանյահուն Թել Ավիվում փակ դռների հետևում հանդիպում է անցկացրել անվտանգության հարցերի և Գազայի հատվածում տիրող իրավիճակի վերաբերյալ: Կառավարության ղեկավարի գրասենյակի տվյալներով՝ հանդիպումը տևել է մոտ երեք ժամ:

Հանդիպման ընթացքում Իսրայելի պաշտպանության բանակի գլխավոր շտաբի պետ Էյալ Զամիրը ներկայացրել է Գազայում հետագա գործողությունների հնարավոր տարբերակները: «Բանակը լիովին պատրաստ է իրականացնել ռազմաքաղաքական կաբինետի ընդունած ցանկացած որոշում»,- ասված է հայտարարության մեջ:

Ավելի վաղ իսրայելական Ynet պորտալը, հղում անելով վարչապետի շրջապատի բարձրաստիճան աղբյուրներին, հայտնել էր, որ երկրի ղեկավարությունը  Գազայի հատվածի լիակատար օկուպացիայի վերաբերյալ որոշման վերջնական փուլում է: Զրուցակիցներից մեկը հայտարարել էր. «Վիճակը նետված է», ընդգծելով, որ իսրայելցի պատանդներին ազատ արձակելու բանակցությունները փակուղի են մտել, և իշխանությունները ուժային լուծումից բացի այլ ելք չեն տեսնում:

Միևնույն ժամանակ, ըստ Ynet-ի, բանակի ղեկավարությունը, նրանց  թվում՝ ինքը՝ Զամիրը, դեմ է արտահայտվում նման քայլին:

Ինչպես օրերս հաղորդել էր The Jerusalem Post-ը՝ հղում անելով կառավարության ղեկավարի գրասենյակի աղբյուրին, Իսրայելի վարչապետ Բենիամին Նեթանյահուն Իսրայելի պաշտպանության բանակի գլխավոր շտաբի պետ Էյալ Զամիրին ուղերձ է հղել, որում պահանջել է Գազայի հատվածի լիակատար օկուպացիայի ծրագրի հաստատում։ «Եթե Գազայի ամբողջական օկուպացիայի ծրագիրը ձեզ չի համապատասխանում, ուրեմն պետք է հրաժարական տաք»,- ասված էր վարչապետի անունից փոխանցված հաղորդագրության մեջ։

Ըստ աղբյուրի՝ Նեթանյահուն արդեն լայնածավալ ցամաքային գործողության մասին որոշում է ընդունել, ներառյալ հնարավոր գործողություններ այն տարածքներում, որտեղ ենթադրաբար պահվում են իսրայելցի գերիներ։

Նախորդ օրը մոտ 600 իսրայելցի պաշտոնաթող բարձրաստիճան պաշտոնյաներ, դրանց թվում՝ հետախուզության նախկին ղեկավարներ, բաց նամակ էին հղել ԱՄՆ նախագահ Դոնալդ Թրամփին՝ կոչ անելով ճնշում գործադրել Նեթանյահուի վրա՝ ստիպելու նրան վերջ դնել պատերազմին։

Նամակի ստորագրողներից մեկը՝ ներքին հետախուզության նախկին ղեկավար Ամի Այալոնը, BBC-ին հայտարարել է, որ հետագա ռազմական գործողություններն անօգուտ կլինեն։

«Ռազմական տեսանկյունից ՀԱՄԱՍ-ը լիովին ոչնչացված է։ Մյուս կողմից, որպես գաղափարախոսություն, այն ավելի ու ավելի մեծ կշիռ է ձեռք բերում պաղեստինյան ժողովրդի, «արաբական փողոցի», ինչպես նաև իսլամական աշխարհում։ Այսպիսով, ՀԱՄԱՍ-ի գաղափարախոսությունը հաղթելու միակ ճանապարհը ավելի լավ ապագա առաջարկելն է»,- նշել է նամակագիրներից մեկը։

Հետևեք մեզ՝ այստեղ