Ադրբեջանը կրակում է Սյունիքի ուղղությամբ. սյունեցիները հոգնել են ապրել թշնամու թիրախում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երեկ ՀՀ ՊՆ-ն հաղորդագրություն տարածեց, ըստ որի՝ օգոստոսի 4-ին՝ ժամը 13:10-ի սահմաններում, Ադրբեջանի ԶՈՒ ստորաբաժանումները կրակ են բացել Սյունիքի մարզի Վերիշեն բնակավայրից 4500 մետր հյուսիս-արևելք ընկած հատվածում միջդիրքային ճանապարհների կառուցման աշխատանքներ իրականացնող էքսկավատորի ուղղությամբ:

MediaHub-ին Վերիշենի բնակիչները պատմեցին, որ սա առաջին դեպքն էր այս ամիսների ընթացքում, որ Ադրբեջանի ԶՈՒ–ն կրակ է բացել Վերիշենի ուղղությամբ։

MediaHub-ը մշտապես ուշադրության կենտրոնում է պահում ադրբեջանական ագրեսիան, չնայած որ իշխանությունը փորձում է «ուշադրություն չդարձնել» Ադրբեջանի կողմից պարբերաբար դարձած կրակոցներին։

Մեզ փոխանցեցին, որ հուլիսից ադրբեջանական կողմի կրակոցները դեպի ՀՀ դիրքեր կամ գյուղեր որոշակի նվազել էին, սակայն, ինչպես նկատում են սյունեցիները, անգամ եթե կրակոցներ կային, ապա դրանք ոչ թե դեպի գյուղեր չէին, այլ դեպի դիրքեր։

«Մենք արդեն տարբերում ենք՝ դեպի գյուղ են կրակոցները, թե դեպի դիրքեր։ Այս մի քանի օրվա ընթացքում կրակոցները քչացել էին, մասնավորապես, եղել են օրեր, երբ դեպի Խոզնավար, Խնածախ  ընդհանրապես չեն կրակել։ Բայց եղել են այնպիսի օրեր, որ կրակոցներն անդադար են եղել՝ ամբողջ գիշեր  կամ ամբողջ օր։ Այս պահին թշնամին իր կրակոցների ուղղությունը փոխել է, Խոզնավարում և Խնածախում սկսել են քիչ կրակել»,- նշեց Վերիշենից մեր զրուցակիցը։

Ըստ նրա՝ 2022թ–ի սեպտեմբերյան մարտերից հետո Վերիշենը հայտնվել է Ադրբեջանի տեսադաշտում, և ոչ միայն Վերիշենը, այլ նաև այլ գյուղեր, ինչպես նաև Գորիսը։ 2022թ–ից ի վեր ոչ մի խախտում չի եղել, չնայած, որ ադրբեջանական դիրքերը տեղակայված են Սև լճի տարածքում, որտեղից երևում են ամբողջ Սյունիքի ողնաշար համարվող տարածքները։ 

«Ահա, երեկ եղան այդ կրակոցները, էքսկավատորը վնասվեց, ՀՀ ՊՆ-ն նշել էր, որ Ադրբեջանը պետք է հետաքննի, սակայն մենք վստահ ենք, որ ոչինչ էլ չի լինի, ոչ կհետաքննեն, ոչ էլ. ինչպես մարտից սկսած կրակում են տների ուղղությամբ, ոչինչ էլ չի լինում, մեկ է կրակում են։ Երբ կրակում էին Խնածախի ու Խոզնավարի ուղղությամբ, մեզ մոտ չէին կրակում, սակայն, ամեն օր սպասում էինք ու անհանգիստ էինք»,– նշեց մեր զրուցակից մանկավարժը։

Ըստ նրա՝ չի բացառվում, որ հաջորդ անգամ քաղաքացիական մեքենայի վրա կրակեն, տներին՝ ինչպես եղել է այլ գյուղերում։ Այս պահին սյունեցիներն անհանգիստ են, կրակոցները անհանգստացնում են բոլորին․ «Ո՛չ կարողանում ենք հանգիստ քնել, ո՛չ ապրել, արդեն հոգնել ենք, թշնամու թիրախում մենք ենք ապրում ու միայն մենք գիտենք՝ ինչ է նշանակում ամեն օր արթնանալ թշնամու զենքի նշանակետում»։

Մարիաննա Արամյան

Հետևեք մեզ՝ այստեղ