Ռումինիայում արջը հոշոտել է իտալացի զբոսաշրջիկին՝ նրա հետ սելֆից հետո
ՄԻՋԱԶԳԱՅԻՆՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Կարպատներում գորշ արջը հարձակվել և սպանել է իտալացի զբոսաշրջիկին, երբ վերջինս փորձել է գազանին ձեռքից կերակրել։ Ոստիկանությունը նրա հեռախոսում գտել է վայրի կենդանիների տասնյակ լուսանկարներ և տեսանյութեր, որոնք վկայում են՝ ինչպես է նա դարձյալ ու դարձյալ չափազանց մոտենում նրանց, հաղորդում է Bild-ը։
48-ամյա Օմար Զ.-ն հինգշաբթի առավոտյան իր մոտոցիկլետով ընթանում էր Ռումինիայի գեղատեսիլ լեռնային ճանապարհով՝ կտրուկ շրջադարձերով և ապշեցուցիչ տեսարաններով հայտնի Տրանսֆագարասան մայրուղով: Սակայն այստեղ զբոսաշրջիկների շրջանում գորշ արջերին կերակրելու վտանգավոր միտում է տարածվել։ Սնունդով գրավված՝ կենդանիները ավելի հաճախ են կորցնում մարդկանց նկատմամբ իրենց բնատուր վախը, և դրա պատճառով երթուղու երկայնքով տասնյակ նախազգուշական նշաններ են տեղադրվել։
Հետաքննության տվյալներով՝ տղամարդը կանգ է առել հենց այդ ցուցանակներից մեկի առջև։
«Նա իջավ մոտոցիկլետից և արջին ուտելիք առաջարկեց։ Հեռախոսով հայտնաբերվել են նաև հարձակումից անմիջապես առաջ արված լուսանկարներ։ Արջն ավելի ու ավելի է մոտենում։ Սրանք խոշոր պլաններ են», - ռումինական հեռուստատեսությանը պատմել է անտառտնտեսության ծառայության աշխատակից Արմանդ Կիրիլոյուն։
«Ահա մի արջ, ինչ գեղեցիկ է, նա գալիս է դեպի ինձ...»,-ենթադրաբար ասում է իտալացին տեսանյութում։ Այնուհետև կենդանին հարձակվում է։ Ականատեսները պատմել են, որ հարձակումից հետո արջը նրա մարմինը քարշ է տվել անտառ, իսկ միջադեպին ակամ ականատես դարձած վարորդները զանգահարել են արտակարգ ծառայություններ:
Օգնության են հասել 40 աշխատակից, որոնցից մի քանիսը զինված էին, բայց երբ նրանք ժամանել են դեպքի վայր, տղամարդն արդեն մահացած էր։ Քանի որ արջը փորձել է հարձակվել փրկարարների վրա, ստիպված են եղել կրակել նրա վրա։ Նախնական տվյալներով, դա, ըստ ամենայնի, իր ձագերին պաշտպանող մայր արջ էր։
Իշխանությունների տվյալներով՝ տարածքում ապրում է ավելի քան 100 գորշ արջ։ Միայն վերջին մեկ ամսվա ընթացքում նրանք անօրինական կերակրման ժամանակ հարձակվել են երեք զբոսաշրջիկների վրա, այդ թվում՝ Իսպանիայից եկած 75-ամյա մի կնոջ, որին հիվանդանոց էին տեղափոխվել կտրված ձեռքով։
Հետևեք մեզ՝ այստեղ




















































