Հղիությունը փոփոխություններ է կատարում կնոջ կյանքի բոլոր ոլորտներում և բացառություն չէ նաև տնային աշխատանքը: Ապագա մայրերից շատ քչերն է, որ կարող են թույլ տալ իրենց հղիության ժամանակ չզբաղվել տնային գործերով: Միևնույն ժամանակ, տնային գործերի թվում կան այնպիսիք, որոնք կտրականապես արգելված են հղիներին, քանի որ կարող են բացասական ազդեցություն ունենալ հղիության ընթացքի և պտղի զարգացման վրա:
Ապագա մայրիկը պետք է բացառի աշխատանքը, որը ենթադրում է ծանրությունների բարձրացում կամ կտրուկ շարժումներ, ուստի, օրինակ, տան կահույքը տեղաշարժելը, ողջ ընտանիքի համար գնումներ կատարելը կամ սիրելի փոքրիկին գրկելը պետք է թողնել հարազատներին:
Իսկ հղի կինը տանը պետք է թեթև գործերով զբաղվի: Բայց թեթև գործերի դեպքում էլ պետք է հիշել, որ պետք չէ երկար ժամանակ նույն տեղում կանգնած մնալ, ցանկալի չէ նաև աշխատել մինչև գերհոգնածությունը. հոգնածության նշանների ի հայտ գալուն պես պետք է թողնել գործերը և հանգստանալ:
Ինչպե՞ս ճիշտ կանգնել
Նույն տեղում երկար ժամանակ կանգնած մնալը պատճառ է դառնում, որ արյունը «սառչի» երակներում և դառնա երակների լայնացման պատճառ:
Կանգնած գործերի ժամանակ ապագա մայրիկը ցանկալի է, որ յուրաքանչյուր ժամվա ընթացքում 5-7 րոպե հանգստանա. նստի աթոռին և ոտքերի տակ ոչ բարձր հենակ դնի: Այս դիրքում լավանում է արյան շրջանառությունը և թուլանում են մեջքի մկանները: Եթե չի հաջողվում նստել, պետք է գտնել օրգանիզմի համար կանգնելու հարմար դիրք:
Կանգնած աշխատելու ժամանակ կարելի է օգտագործել նաև ոչ բարձր` 20-30 սմ բարձրություն ունեցող աթոռիկ` հերթականությամբ ծնկները ծալելով հենվելով դրա վրա: Այդպես կարելի է կանխել մեջքի մկանների գերլարումը:
Երկար կանգնած մնալու դեպքում ոտքերում արյան շրջանառությունը լավացնելու համար խորհուրդ է տրվում երբեմն-երբեմն սեղմել ոտքերի մատները, ապա թուլացնել, կանգնեք ոտնաթաթերի վրա, մարմնի ծանրությունը կենտրոնացրեք մի, ապա մյուս ոտքի վրա: Նման վարժություն կարող եք կատարել յուրաքանչյուր 10-15 րոպեն մեկ կամ երբ կանգնելուց անհարմարություն եք զգում:
Ինչպե՞ս ճիշտ կռանալ
Հղիության ընթացքում փոփոխվող հորմոնային ֆոնը ազդում է նաև կրճիկային հյուսվածքների վրա. դրանք (այդ թվում և միջողային դիսկերը) ավելի խոցելի են դառնում: Այդ պատճառով էլ ոչ միայն հղիության երկրորդ կեսին, այլ հենց առաջին եռամսյակից սկսած կարևոր է բացառել ողնաշարի ծանրաբեռնվածությունը: Չի կարելի կռանալ կամ ծանրություններ բարձրացնել, ինչպես նաև կտրուկ պտույտներ կատարել: Դա կարող է միջողային դիսկերի և հոդերի վնասված առաջացնել. դրանցում միկրոճաքեր են առաջանում, որոնք էլ մեջքում ցավերի պատճառ են դառնում: Այդ վնասվածքները կարող են նաև ողնաշարի ճողվածքի պատճառ դառնալ:
Եթե տնային գործեր կատարելիս մեջքում կամ գոտկատեղում ցավեր են առաջանում, կարող եք կրել հատուկ վիրակապ, որը կպահի փորը: Վիրակապի կրելիս պետք է խորհրդակցել բժշկի հետ, ով քաջածանոթ է ձեր հղիության առանձնահատկություններին:
Սկզբում հարկավոր է մի փոքր ծալել ծնկները և մարմնի քաշը կենտրոնացնել դրանց վրա, ապա պետք է մի փոքր թեքվել առաջ և վերցնել այն, ինչ անհրաժեշտ է: Կարելի է նաև կռանալու փոխարեն մի ոտքի վրա ծնկի իջնել:
Ինչպե՞ս ճիշտ նստել
Շատ ապագա մայրիկներ հաճույքով են զբաղվում կարուձևով: Չնայած դրական հոգեբանական ազդեցությանը, այս գործընթացը նաև բացասական կողմեր ունի, որը կարող է ազդել մոր առողջության և հղիության ընթացքի վրա:
Շատ կարևոր է, որ նստելիս մեջքը հենեք աթոռի թիկնամասին, անհաժեշտության դեպքում կարող եք բարձիկ դնել ողնաշարի հատվածում, իսկ ոտքերի տակ ոչ բարձր աթոռիկ: Ցանկացած նստակյաց աշխատանք հարկավոր է ժամանակ առ ժամանակ ընդհատել. երկար ժամանակ նստած մնալը մեջքում ցավերի պատճառ կարող է դառնալ: Այդ պատճառով էլ յուրաքանչյուր ժամվա ընթացքում հարկավոր է քայլել 5-10 րոպե:
Ապագա մայրիկին արգելվում է նստել` ոտքը ոտքին գցած. դա ոչ միայն խանգարում է արյան նորմալ շրջանառությանը` նվազեցնելով պտղին հասնող արյան քանակը, այլև մեծացնում է ողնաշարի ծանրաբեռնվածությունը` ուժեղացնելով ցավը:
Ինչպե՞ս ճիշտ քայլել
Հղիության ժամանակ զբոսանքները օգտակար են: Քայլելը կօգնի նաև խուսափել երակների լայնացումից: Սակայն ամեն ինչ չափի մեջ է լավ. Հենց կզգաք, որ հոգնել եք, հարկավոր է նստել և 5-10 րոպե հանգստանալ: Եթե այգում զբոսնելու հնարավորություն չունեք, փողոցում քայլեք, պարզապես ընտրեք ոչ ծանր երթևեկություն ունեցող ճանապարհներ, որպեսզի մեքենաների արտանքետած գազերը քիչ շնչեք:
Հարկավոր է քայլել ուղիղ, բայց առանց ուսերը լարելու: Հղիության ընթացքում պետք է մոռանալ բարձրակրունկ կոշիկների մասին: Կրունկի բարձրությունը չպետք է գերազանցի 3-4 սմ-ը:
Ի՞նչ չի կարելի անել
Հղի կնոջը հակացուցված է.
- Կտրուկ շարժումներ պահանջող աշխատանքը
- Աշխատանքը, որ ենթադրում է աստիճաններին կամ այլ բարձր տեղերում կանգնելը
- Ծանրությունների բարձրացում պահանջող աշխատանքը
- Կենցաղային քիմիայի, հատկապես սուր հոտերով, օգտագործմամբ գործերը
- Վերանորոգման հետ կապված ցանկացած աշխատանք
Բոլոր դեպքերում աշխատելիս պետք է պահպանել անվտանգության հիմնական կանոնները
- Լվացող միջոցների հետ աշխատել ձեռնոցներով
- Լվացք փռելիս բարձրությունների վրա չկանգնել
- Ջրով լի ծանր դույլեր չվերցնել
- Բեռը ձեռքերում բաշխել հավասարաչափ:
