Բասկետբոլի Եվրոպայի Մ20 տարեկանների Բ դիվիզիոնի առաջնությանը մասնակցելու համար Երևան կժամանեն շուրջ 400 մարզիկ ու 1000–ից ավել երկրպագու։ Այս մասին այսօր լրագրողների հետ զրույցում ասաց ԿԳՄՍ նախարար Ժաննա Անդրեասյանը:
Նախարարը հույս ունի, որ հայ երկրպագուները նույնպես ակտիվ մասնակցություն կունենան խաղերին:
«Այս օրերին երկրպագուների ներկայությունը ազգային թիմի խաղերին ավելի մեծ ոգևորություն կտա մեր հավաքականին»,– ասաց նա:
Ժաննա Անդրեասյանը տեղեկացրեց, որ առաջնության բոլոր հանդիպումները հեռարձակվելու են Բասկետբոլի միջազգային ֆեդերացիայի յութուբյան ալիքով: Ըստ նրա` սա ևս մեկ հնարավորություն է մեր երկրի հանրահռչակման հարցում, որովհետև շուրջ 3 միլիոն բաժանորդ ունեցող յութուբյան ալիքում Հայաստանում անցկացվող Եվրոպայի առաջնության խաղերի ցուցադրությունը նաև նպաստելու է երկրի ճանաչելիությանը:
Նախարարը ուրախությամբ նշեց, որ վերջին շրջանում Մ20 հավաքականը բավականին մեծ հաջողություններ է գրանցում, լավ որակի խաղ է ցույց տալիս: Նա վստահություն հայտնեց, որ Հայաստանը կունենա լավ արդյունքներ։
Նշենք, որ առաջնությունը Երևանում կանցկացվի հուլիսի 11-20-ը, կմասնակցի 21 երկիր։ Հայաստանի մրցակիցները կլինեն Լատվիան, Չեռնոգորիան, Էստոնիան և Իռլանդիան։
