Տնօրեն գործուղելու կարգը հաստատելու մասին նոր նախագիծ է ներկայացվել. ի՞նչ է փոխվել. «Փաստ»

«Փաստ» օրաթերթը գրում է.

Դեռևս մարտի 27-ին ԿԳՄՍ նախարարությունը հանրային քննարկման էր ներկայացրել «Պետական ուսումնական հաստատություն տնօրեն գործուղելու կարգը հաստատելու մասին» նախագիծը։ Քննարկման վերջնաժամկետը ապրիլի 11-ն էր: Սակայն նախօրեին նախարարությունը նույն անունով նոր նախագիծ է ներկայացրել հանրային քննարկման: Մենք ուսումնասիրեցինք նախորդ նախագիծը, և պարզվեց, որ իրավական ակտերի նախագծերի հրապարակման միասնական կայքում այն ստացել է 56 տոկոս դեմ ձայն: Ավելին, եղել է մոտ 40 առաջարկ ու դիտողություն: Ի՞նչ է ասվում նոր նախագծում:

«Հանրակրթության մասին» օրենքում փոփոխություններ և լրացումներ կատարելու մասին» 2024 թվականի հոկտեմբերի 24-ի N ՀՕ-387-Ն օրենքի 9-րդ հոդվածի 3-րդ մասով ամրագրվել է ԿԳՄՍ նախարարի հրամանով պետական ուսումնական հաստատություն տնօրեն գործուղելու կարգի հաստատումը՝ որպես լիազորող նորմ: Իրավական ակտի ընդունման անհրաժեշտությունը պայմանավորված է այն հանգամանքով, որ ներկայում բազմաթիվ են դեպքերը, երբ հանրակրթական ուսումնական հաստատության տնօրենի պաշտոնը տևական ժամանակ թափուր է մնում օրենքի պահանջին համապատասխանող հավակնորդների բացակայությամբ կամ դիմողների՝ հարցազրույցի փուլը չհաղթահարելու պատճառով:

Ներկայում հանրակրթական ուսումնական հաստատություններ տնօրենների գործուղման գործընթաց առկա չէ: Նախագծով առաջարկվում է հանրակրթական ուսումնական հաստատություն տնօրենի գործուղում այն դեպքում, եթե առնվազն երեք անգամ հայտարարված մրցույթի արդյունքներով տնօրենի թափուր տեղը չի համալրվել կամ տնօրենն ազատվել է աշխատանքից՝ հաստատության ցածր կատարողականի կամ ցածր կատարողական ունենալու համար աջակցություն ստանալուց հետո առաջընթաց չապահովելու հետևանքով, և երկու անգամ հայտարարված մրցույթի արդյունքում թափուր տեղը չի համալրվել: Նախագծով առաջարկվում է գործուղվող տնօրենին տրամադրել ամսական 138 300 դրամ լրավճար՝ հինգ տարի ժամկետով, որը ներառում է աշխատավարձից վճարվող հարկերը, սոցիալական կամ օրենքով սահմանված պարտադիր այլ վճարներ։

Սահմանվում է նաև, որ գործուղման համար հավակնորդ է հանդիսանում այն անձը, որն օրենսդրությամբ սահմանած կարգով ուսումնական հաստատության ղեկավարման իրավունքի հավաստագիր ստանալու համար էլեկտրոնային համակարգում ներկայացվող դիմումում նշում է կատարում որպես տնօրեն գործուղվելու համաձայնության, ինչպես նաև գործուղման համար նախընտրելի մարզի (Երևանի) մասին և ստանում է հավաստագիր:

Հավակնորդի՝ գործուղվելու վերաբերյալ գրավոր համաձայնությունը ստանալուց հետո նրան տրվում է երկշաբաթյա ժամկետ՝ ԿԳՄՍ նախարարի 2022 թվականի սեպտեմբերի 22-ի N 35-Ն հրամանով հաստատված ձևաչափին համապատասխան տվյալ հաստատության զարգացման իր ծրագիրը ներկայացնելու համար, որի փորձաքննությունն իրականացվում է կառավարության 2023 թվականի փետրվարի 9-ի N 181-Ն որոշմամբ սահմանված կարգով:

Հարցազրույցի փուլում որոշում է կայացվում հավակնորդներից որևէ մեկին 5 տարի ժամկետով տվյալ հաստատություն գործուղելու վերաբերյալ, և տրամադրվում է ուղեգիր՝ լիազոր մարմնին ներկայացնելու համար:

Նախագծի ընդունումը նախատեսում է պետական բյուջեի ծախսերի ավելացում: 2026 թվականին նախատեսվում է ունենալ 12 գործուղված տնօրեն: Մեկ գործուղվող տնօրենի համար տարեկան նախատեսվում է մոտ 2 մլն դրամ, ընդհանուր հաշվով՝ 24 միլիոն դրամ:

Ի դեպ, նախորդ տարբերակում նշված էր, որ 2026 թվականին նախատեսվում է ունենալ 26 գործուղված տնօրեն, իսկ ընդհանուր ծախսը պետք է լիներ 52 միլիոն դրամ:

Մանրամասները՝ «Փաստ» օրաթերթի այսօրվա համարում