«Ներկայացումը յութուբից չեմ թռցրել որոշ կոլեգաների նման, այն մերն է, մեզնից ծնված». «Ջինսի սերունդը» դրաման՝ «Թատրոն տանիքում»-ում

«Թատրոն տանիքում»-ում վերջերս կայացավ ռեժիսոր Արթուր Սարիբեկյանի «Ջինսի սերունդը» ներկայացման պրեմեիրան: Դերասանական կազմում ընդգրկված են Վահան Միրաքյանը, Անի Կիրակոսյանը, Արսեն Ալբարյանը, Արսեն Ազիզյանը, Հայկ Հովհաննիսյանը, Սաթենիկ Հազարյանը, Մինաս Ասրյանը, Արամ Կոստանյանը:  

«Պիես որպես այդպիսին չկա: Կա վեպ, որի հեղինակը ժամանակակից վրացի գրող Դատո Տուրաշվիլին է, այն կոչվում է « Ջինսի սերունդը», որը գրվել է իրական փաստերի հիման վրա:

Դեպք, որը Վրաստանում տեղի է ունեցել 1980 ականներին, մի սերնդի հետ, ովքեր խեղդամահ էին լինում սովետական լոզունգներից:

Վեպից պիեսի վերածեցի ինքս, բարդ էր ու միևնույն ժամանակ հետաքրքիր, երբեմն էլ՝ դժվար ու անհաղթահարելի, բայց հաղթահարեցի, ստացա այն, ինչ ուզում էի»,- Tert.am Life-ի հետ զրույցում պատմեց ներկայացման ռեժիսորը:

Արթուր Սարիբեկյանն ընտրեց այս գործը, որովհետև պիեսում ու առավել ևս վեպում տեսավ մարդկանց, ովքեր հանուն գաղափարի ու հանուն ճշմարտության պատրաստ են ամեն ինչի:

«Այս դեպքում պատրաստ են առևանգելու նույնիսկ օդանավը, որ նրանց ձայնը լսելի դառնա, որ իրենց նման երիտասարդները չկորեն համակարգի բեռի տակ:

Նրանք ի վիճակի էին ազատությունը սանձարձակությունից տարբերել, իսկ նման կերպարներն ու ասելիքով լի աշխատանքները ձգում են ինձ, ոգևորում, ստիպում ապրել նայելով առաջ»,- նշեց Արթուր Սարիբեկյանը:

Նա նշեց, որ նման աշխատանքներ բեմադրելիս շատ կարևորում է հատկապես դերասանական անձնակազմը:

«Դրա համար ինձ պետք էր ընդլայնված քասթինգ անել և ընտրել ամենատարբեր արտիստների՝ սկսնակներից մինչև տարեց ու կայացած:  Թե ինչո՞վ է տարբերվում այս ներկայացումը, կդժվարանամ ասել, բայց մի բան ակնհայտ է, որոշ կոլեգաների նման յութուբից չեմ թռցրել ամբողջ ներկայացումը, այն մերն է, մեզնից ծնված»,- Tert.am Life-ի հետ զրույցում անկեղծացավ ռեժիսորը: