«Աղջկաս թույլ չեմ տվել քիթը վիրահատի, չեմ հասկանում իրենց գեղեցիկ դեմքն ինչի՞ են այլանդակում». Ջուլիետա Ստեփանյան

Դերասանուհի Ջուլիետա Ստեփանյանը դեմ է պլաստիկ վիրահատություններին: Այն, ինչ բնական է, ավելի գեղեցիկ է ու ներդաշնակ, կարծում է նա: Tert.am Life-ի հետ զրույցում նա պատմել է, որ անգամ դստերը թույլ չի տվել դիմել պլաստիկ վիրահատության:

«Ես այդ աղջիկներին համարում եմ ինկուբատոր, որովհետև բոլորն իրար նման են  ու ես բացարձակ դեմ եմ,  որ երիտասարդ հասակում Աստծու տված դիմագծերը փոփոխում են:

Ուրիշ հարց, որ 50-ից հետո կանայք ուզում են իրենց հետևեն, մի քիչ խնամված լինեն, դեմքի կնճիռներն են վերացնում, աչքերի այտուցներն են վերացնում, ես դա հասկանում եմ:

Իմ աղջիկն էլ էր ուզում քիթը վիրահատել, ասացի՝ չանես, որովհետև, եթե վիրահատես, ես քո դեմքին չեմ նայի: Բայց իմ շրջապատում շատ մարդիկ կան, որ տարբեր վիրահատություններ են անում, ասում եմ, որ ինձ դուր չի գալիս: Ասում եմ՝ քո գեղեցիկ դեմքն ինչի՞ ես այլանդակում, դարձնում ուրիշ, անգամ միմիկաներն են դառնում ուրիշ,  քո բնականը պիտի լինի, որ հարմոնիկ լինի քո ներքին աշխարհի հետ:

Եթե մարդ սարսափելի քիթ ունի, որ իսկապես չի կարողանում տանից դուրս գալ, ամաչում է, այդ դեպքում կարելի է ինչ-որ ձևով միջամտել, բայց ամեն մի քիթ գնալ, դարձնել կուրնոս դեմ եմ:

Նույն դեմքը, նույն քիթը, նույն շրթունքները, նույն հոնքերը, այնքան նման են իրար, ես շատ հաճախ չեմ էլ տարբերում աղջիկներին, ովքեր ինձ հետ նկարահանվում են:

էկրանին տեսնում եք բոլոր աղջիկները բացարձակ նույնն են ու տպավորություն է, որ նույն դեր են խաղում:

Ու այդ դերից էլ ոչինչ չես հասկանում, որովհետև տիկնիկի նման սարքած են,

տհաճ է նույնիսկ: Տղաներին էլ դա դուր չի գալիս, ես հարցրել եմ: Այն, ինչ արհեստական է, այլևս պետք չէ»,- Tert.am Life-ի հետ զրույցում ասել է դերասանուհին։