Երևանի ու Կապանի օդային կապը վերականգնվել է․ «Հետք»

Երևանի ու Կապանի միջեւ օդային հաղորդակցությունն ապրիլի 18-ից վերականգնվել է, գրում է «Հետք»-ը:

Հիշեցնենք, որ Երեւան-Կապան-Երեւան չվերթն իրականացնող «ՆովԷյր» ավիաընկերությունը, որը դեպի Կապան կոմերցիոն թռիչքները մեկնարկել էր 2023-ի օգոստոսին, վերջին անգամ Սյունիքի մարզկենտրոն էր թռել ու վերադարձել այս տարվա փետրվարի 26-ին: Դրանից հետո ընկերության միակ օդանավը՝ L-410UVP-E20-ը (հայկական գրանցումը՝ EK-4117), կանգնած էր «Զվարթնոց» օդանավակայանում, որտեղից մարտի 20-21-ին Երեւան-Սամսուն (Թուրքիա)-Բուխարեստ (Ռումինիա)-Կունովիցե (Չեխիա) երթուղով թռել էր Չեխիա՝ պլանային տեխսպասարկում անցնելու: Ապրիլի 9-10-ին EK-4117-ը Կունովիցե-Բուրգաս (Բուլղարիա)-Սամսուն-Երեւան ուղեգծով բորտը վերադարձել էր Հայաստան:

Ապրիլի 16-ին գրել էինք, որ «ՆովԷյրը» նոր սեփականատեր ունի: Այս տարվա մարտի 18-ին դրա միանձնյա փայատեր է դարձել «Զանգեզուրի պղնձամոլիբդենային կոմբինատ» բարեգործական հիմնադրամը, որը պատկանում է հանքարդյունաբերական հսկա ԶՊՄԿ-ին: Մինչ այս ավիափոխադրողի տերը ՀՀ-ում Ավստրիայի պատվո հյուպատոս, գործարար Արամ Նովելի Մարությանն էր, որը նախկինում եղել է նաեւ Քաղավիացիայի գլխավոր վարչության (ներկայում՝ Քաղավիացիայի կոմիտե) պետի տեղակալ:

Սեփականատիրոջ փոփոխությունից հետո թարմացում է սպասվում նաև «ՆովԷյրի» պաշտոնական կայքում, որի վրա այժմ տեխնիկական աշխատանքներ են կատարվում:

Ինչպես տեղեկանում ենք «Զվարթնոց» օդանավակայանի կայքից եւ թռիչքներին առցանց հետեւող flightradar24.com-ից, «ՆովԷյրի» L-410 օդանավը նախորդ ուրբաթ օրը՝ ամսի 18-ին, եւ այսօր՝ ամսի 21-ին, Երեւան-Կապան-Երեւան թռիչքներ է կատարել: Հիշեցնենք, որ 2023-ի օգոստոսից օպերատորը չվերթն իրականացնում էր երկուշաբթի եւ ուրբաթ օրերին, իսկ 2024-ի սեպտեմբերից սրանց ավելացավ նաեւ չորեքշաբթին: Ինչպես արդեն գրել ենք, սպասվում են ամենօրյա թռիչքներ:

Հավելենք, որ 2023-ի օգոստոս-դեկտեմբեր ամիսներին «ՆովԷյրը» Երեւան-Կապան-Երեւան երթուղով տեղափոխել է 207 ուղեւորի, իսկ 2024-ի ընթացքում՝ 1365 հոգու: Սա միակ ավիաընկերությունն է Հայաստանում, որ ներքին թռիչքներ է կատարում, Երեւան-Կապան-Երեւանն էլ առայժմ միակ ներքին չվերթն է մեր երկրում: