Երբ է տղամարդը դավաճանում

Ինչպես ասում են` ոչինչ այս աշխարհում հենց այնպես չի լինում: Պարզվում է` անհավատարմությունն ունի զարմանալի շարժիչ ուժ, որին կուլ են գնում բոլոր տղամարդիկ: Մի՛ հուսահատվիր. եթե իմանաս` ինչպես է դա գործում, կարող ես քո տղամարդուն հեռու պահել գայթակղությունից:

Ըստ Բեթանի Հայթմանի

Սիրած մարդու դավաճանությունը մեզ խոր ցավ է պատճառում: Ամենասարսափելին այն է, որ չես հասկանում` ինչը կարող էր նրան նման քայլի մղել. չէ՞ որ հասկանալու դեպքում կկարողանայիր որևէ բան փոխել: Այսպես` վերջերս «Հորմոններ և վարքագիծ» ամսագրում տպագրված ուսումնասիրությունը պարզել է, որ օրգանիզմում կենսաբանական հետաքրքիր շարժ է տեղի ունենում, որն էլ հանկարծակի կերպով տղամարդուն ավելի դյուրազգաց է դարձնում` մղելով անհավատարմության:

Ըստ հետազոտողների` երբ տղամարդը նոր ու գրավիչ կնոջ է հանդիպում, նրա տեստոստերոնի (արական հորմոն) մակարդակը վայրկենապես բարձրանում է` հուզական մեծ ալիք ստեղծելով: «Այս դեպքում տղամարդկանցից շատերն ինտիմ զգացողություն են ապրում, նույնիսկ կարող են սեր զգալ այդ կնոջ հանդեպ,- ասում է Քրիստոֆեր Ռայանը, որն ուսումնասիրությունը վերլուծել է իր համահեղինակած` «Սեքս արշալույսին...» գրքում: - Այս զգացողությունը կարող է նրա մոտ այդ կնոջ հետ անկողնում սեքսի տարբեր դիրքեր փորձելու ցանկություն առաջացնել»:

Բնականաբար, չես կարող նրա տեստոստերոնի բարձրանալը կանխել, եթե նրա աշխատավայրում նոր աղջիկ են ընդունել, կամ էլ շենքում մի սիրունիկ հարևանուհի է հայտնվել: Բայց կարող ես չեզոքացնել վտանգը: «Եթե անընդհատ փոքրիկ հնարքների դիմես, որոնք ոչ միայն նրա տեստոստերոնն են բարձրացնում, այլև հաճելի զգացողությունների համար պատասխանատու հորմոնը` դոպամինը, նա մշտապես կհարմարվի քո «հավելյալ մատուցվող» ծառայություններին»,- ասում է հարաբերությունների թերապևտ Պատրիսիա Լավը: Հետագայում, երբ որևէ հմայիչ կնոջ ազդեցության տակ ընկնի, միևնույն է, ձեր հարաբերություններից ավելի հզոր, ավելի հուզական ու տպավորիչ բան չի զգա: Խորհրդակցելով լավագույն բժիշկների և հոգեբանների հետ` բացահայտել ենք տղամարդկանց հորմոնների վրա ազդելու 4 անհավանականորեն պարզ միջոց:

Ինչպես արթնացնել նրան. Cosmo-ի խորհուրդը

«Տղամարդու օրգանիզմում տեստոստերոնի ամենաբարձր մակարդակը վաղ առավոտյան է լինում` մոտավորապես ժամը 5-6-ի սահմաններում»,- ասում է Ռիդուան Շաբսայը` Տղամարդկանց առողջության միջազգային կազմակերպության նախագահը: Ուրեմն զարթուցիչն ավելի վաղ ժամի վրա դիր, որպեսզի հասցնես ճիշտ ժամանակին գործի անցնել: Բոնուս. հրաշալի սեքս է ստացում, երբ այս հորմոնն իր գագաթնակետի վրա է. այս ժամանակ նա ավելի գրգռված ու ագրեսիվ է: Եվ պետք է դա անել պարբերաբար: Շաբաթական մեկ անգամը ճշգրիտ հաշվարկ է: «Եթե գործի դնես այս հնարքը, նա մեխանիկորեն քեզ կկապի բարձր տեստոստերոնի պարգևած հրաշք զգացողության հետ»,- ասում է Լավը:

Գովեստի խոսքեր ասա

Կարևոր չէ` որքան զարգացած է ընկերդ: Ամեն անգամ նրան հիացմունքի խոսքեր ասա. դրանից նրա սիրտը կսկսի բաբախել կրծքի տակ: «Ապացուցված է, որ անձին ուղղված գովեստի խոսքերը բարձրացնում են տղամարդու տեստոստերոնի մակարդակը»,- ասում է ուրոլոգ Ռոն Կունը: Այնպես որ, եթե աշխատանքում հաջողության է հասել, քեզ համար ընթրիք է պատրաստել, անկողնում իսկական փոթորիկ է արել, կամ պարզապես ջինսե տաբատը նրան շատ է սազում, անպայման ասա այդ մասին: Այդ մի քանի բառը կարող է դրականորեն ազդել ձեր 
զգացմունքների վրա:

Սիրախաղ արա մեկ ուրիշի հետ

Սպորտը տեստոստերոնի հրաշալի խթանիչ է, և դա պատահական չէ. մրցակցությունը տղամարդկային հորմոնի համար մեծ շարժիչ ուժ է: Բարեբախտաբար, նրան ձեռնոց նետելու համար կարիք չկա դեմ առ դեմ բասկետբոլի կամ ֆուտբոլի դաշտ դուրս գալ (չնայած` դա էլ կարող ես փորձել): «Երբ տղամարդը զգում է, որ քո ուշադրությունը շեղել է մեկ այլ տղամարդուց, նրա ներսում հուզմունքի ալիք է բարձրանում»,- ասում է Լավը: Հաջորդ անգամ, երբ միասին որևէ տեղ եք գնում, մի փոքրիկ սիրախաղ բեմադրիր, հետո վերադարձիր և նստիր նրա կողքին: Երբ նա զգա, որ դու, այնուամենայնիվ, նախընտրեցիր իրեն, հուզմունքից ու հաճույքից կմարի:

Թող` գուշակի

Հարաբերությունները պարբերաբար նորույթներով համեմելը տղամարդու ուղեղում կբարձրացնի դոպամինի մակարդակը: «Նորույթը կարող է լինել անկողնու նոր դիրքը կամ երեկոյան զբոսանքների գաղափարը»,- ասում է Լավը: Ինչպես տեստոստերոնը, դոպամինը նույնպես տղամարդու վրա մեծ ազդեցություն ունի. այս հորմոնը նույնիսկ ավելի սերտորեն է կապված ռոմանտիկ հաճույքների հետ: Քեզ հետ ժամանակ անցկացնելիս որքան բարձր լինի դոպամինը, այնքան ուժգին կլինի քո հանդեպ նրա սիրահարվածությունը: Սովորություն դարձրու շաբաթվա կտրվածքով թարմ գործողություններ ձեռնարկելը: Երեքշաբթի օրը նոր ու հետաքրքիր կրծկալ հագիր և հնարավորություն տուր նրան գնահատել դա: Հաջորդ օրն առաջարկիր որևէ նոր ֆիլմ դիտել միասին: Այսպես կամրապնդես հարաբերություններդ և միաժամանակ կակտիվացնես նրա հորմոնները: