Իշխանությունների հետ համագործակցության վերաբերյալ հստակ պատկերացումներ կլինեն. Աղվան Վարդանյան

Հայաստանի Հանրապետական կուսակցության և ՀՅԴ-ի միջև համագործակցության ձևաչափի վերաբերյալ որոշակի պատկերացումներ կլինեն ամենաուշը մեկ շաբաթից: Այս մասին Ազգային ժողովում լրագրողների հետ զրույցում ասաց ԱԺ ՀՅԴ խմբակցության քարտուղար Աղվան Վարդանյանը: «Մեր ելման կետը երկրում որակական փոփոխությունների իրականացումն է: Մենք պատրաստ ենք մեր մասնակցությամբ, մեր ախատանքով մասնակցել երկրում որակական փոփոխությունների իրականացմանը: Եթե մենք տեսնում ենք, որ կա հնարավորություն մեր պատկերացումները կյանքի կոչելու, երբեք չենք հրաժարվում պատասխանատվությունից և աշխատանքից»,-«Արմենպրես»-ի հաղորդմամբ՝ նշեց Վարդանյանը:

Անդրադառնալով ՀՅԴ խմբակցության ղեկավար Արմեն Ռուստամյանի հայտարարությանը, թե իշխանությունները հեղինակազրկված են՝ Աղվան Վարդանյանն ընդգծեց, որ վերջին երեք օրերի աժիոտաժն ավելի շատ ստեղծվել է լրագրողական համայնքի կողմից: «Կարծես թե երեկ ամեն ինչ տեղն է ընկել: Եթե հետևել եք Հանրապետական գործիչների ելույթներին, կտեսնեք, որ այդպես է: Եկեք այդ ամենի վրա չկենտրոնանանք: Ակնհայտ է, որ ցանկացած իշխանություն ամենաբարենպաստ երկրում անպայման ունենում է հեղինակության կորուստ, և չի կարող որևէ այլ բան լինել: Բայց Արմեն Ռուստամյանն այդ ամենն աս ել է տրամաբանական վերլուծության համատեքստում, իսկ նրա խոսքը ներկայացվել է այդ համատեքստից կտրված, ինչի մասին նա էլ երեկ պարզաբանումներ տվել է»,- ընդգծեց պատգամավորը:

Հարցին, թե Արմեն Ռուստամյանի հայտարարությունը չի՞ վնասի իշխանությունների հետ համագործակցության շուրջ բանակցություններին, Աղվան Վարդանյանը պատասխանեց. «Մեր աշխատանքը նույն ընթացքով շարունակում ենք:  Գիտեք, որ մենք քննարկում ենք մեր անելիքները, հիմնական ուղղությունները, որևէ վտանգված բան չկա: Ամբողջ ցավն այն է, որ լրատվամիջոցները ամեն ինչ հանգեցնում են պաշտոնների՝ նախարար, մարզպետ և այլն: Դա չէ էականը, դա չէ էությունը, դա չէ խնդիրը: Մենք հարցեր ունենք քննարկելու երկրում փոփոխություներ իրականացնելու վերաբերյալ՝ համաձայնեցնելով մեր մոտեցումները, և այս առումով շտապելու որևէ բան չկա»,- հավելեց ՀՅԴ խմբակցության քարտուղարը:

Նա ևս մեկ անգամ հստակեցրեց, որ  այս պահին իշխանությունների հետ քննարկում են հետագա անելիքները, ուղղությունները, որոնք վերաբերում են բոլոր ոլորտներին: «Մենք հիմա ունենք պատկերացումը, տեսլականը, գիտենք  երկրի առջև ծառացած խնդիրները, գիտենք երկրի այս շրջանի սոցիալ-տնտեսական բոլոր մարտահրավերները: Կարևոր է, որ մարդիկ տեսնեն՝ տարբեր  ուղղություններով կա ընդհանուր գիծ և դրանց վերաբերյալ կա համաձայնություն քաղաքական ուժերի մեջ, և նրանք համագործակցում են:  Սա եթե լինի, մենք կստանձնենք նաև պատասխանատվություն»,- եզրափակեց Վարանյանը: