Մեր հայրենակից Լազր Գալստյանը ստեղծել է Wordle խաղի հայերեն տարբերակը

2020 թ.-ին՝ համավարակի շրջանում, ծրագրավորող Ջոշ Ուորդլը որոշում է բառախաղ ստեղծել իր ընկերուհու համար: Սկզբում այն խաղում էին բացառապես Ջոշն ու նրա ընկերուհին, այնուհետև ընկերներն ու բարեկամները: 2020 թ.-ի նոյեմբերի վերջին Ջոշի նախաձեռնությամբ խաղը հայտնվում է համացանցում: Մի քանի օրվա ընթացքում այն օրական խաղում էր մոտ 300 հազար խաղացող: Դեկտեմբերի կեսերին խաղացողների թիվը հասնում է 2 միլիոնի: 2021 թ.-ի հունվարին ծրագրավորողը խաղը վաճառում է Նյու Յորք Թայմսին մի քանի միլիոն դոլարով: 2022 թ.-ին Wordle-ը դառնում է Գուգլում ամենաշատ փնտրված բառը: Այս խաղի մասին պատմելու առիթը մեր հայրենակից Լազր Գալստյանն է:

Նա ստեղծել է Wordle խաղի հայերեն տարբերակը: Այս խաղը հրաշալի հնարավորություն է մարզելու տրամաբանությունը, թարմացնելու բառապաշարն ու հիշողությունը, և կարևոր է, որ այն արդեն հասանելի է մեր մայրենի լեզվով՝ հենց Լազրի շնորհիվ: Խաղ մուտք գործելիս ձեր առջև հայտնվում են տառեր, և, օրինակ՝ հինգ տառանոց բառը գուշակելու համար ունեք վեց հնարավորություն: Մշտապես դժգոհում ենք, որ հայերենով քիչ են տրամաբանական խաղերը և հաճախ ստիպված ենք լինում օտար խաղերի օգնությանը դիմելու, բայց այս պարագայում մեր հայրենակցի շնորհիվ ունենք Wordle-ի հայերեն տարբերակը:

Լազր Գալստյանը ծնունդով Երևանից է: 2014-2018 թթ. Բարձրագույն կրթությունն է ստացել Հայաստանի ամերիկյան համալսարանում, բակալավրի աստիճան ստանալով բիզնես մասնագիտացմամբ: 2018-2019 թթ. աշխատել է էկոնոմիկայի նախարարությունում՝ որպես տնտեսական վերլուծաբան: Մասնագիտական հմտություններն էլ ավելի խորացնելու համար Լազրը որոշել է կրթությունը շարունակել Միացյալ Նահանգներում: 2019-2020 թթ. սովորել է Դյուկի համալսարանում (Duke University)՝ ստանալով մագիստրի աստիճան բիզնես անալիտիկա ուղղությամբ: 2022 թ.-ից մինչ օրս որպես տվյալագետ աշխատում է Warner Bros Discovery ընկերությունում: