Չափազանց հետաքրքիր փաստեր քթի վիրահատության մասին, որոնք պարտադիր պետք է իմանալ

Ռինոպլաստիկան, որն ավելի հայտնի է որպես քթի պլաստիկ վիրահատություն, Հայաստանում մեծ տարածում է ստացել: Հասարակության շրջանում դրա պահանջարկը տարեցտարի ավելանում է:

Այսօր այս վիրահատությունը հասանելի է ոչ միայն հարուստ եւ հայտնի մարդկանց, այլեւ բոլոր նրանց, ովքեր պատրաստվում են հարուստ եւ հայտնի դառնալ: Զարմանալի չէ, որ այս վիրահատության մասին բազմաթիվ առասպելներ են տարածվում: Եվ եթե դրանցից մի քանիսն անհիմն չեն, մյուսները միանգամայն սխալ են եւ ոչ մի ընդհանուր բան չունեն իրականության հետ: 

Ռինոպլաստիկա կարող է անել ցանկացած պլաստիկ վիրաբույժ

Պաշտոնապես այդպես է: Պլաստիկ վիրաբույժների մեծ մասի ծառայությունների ցանկում ռինոպլաստիկան անպայման ներառված է: Սակայն դա դեռ չի նշանակում, որ ամեն վիրաբույժ կարող է այդ վիրահատությունը պատշաճ որակով կատարել եւ լավ արդյունք ստանալ:

Ռինոպլաստիկան բավական բարդ վիրահատություն է ինչպես բժշկական, այնպես էլ էսթետիկ տեսակետից: Ավելի խելամիտ է սեփական քիթը վստահել պրոֆեսիոնալի, ում համար ռինոպլաստիկան հիմնական մասնագիտություն է, որը նա կատարում է ամեն օր: Վիրաբույժների շրջանում հենց քթի վիրահատությունն է համարվում «վարպետության գագաթնակետ»:

Քանի որ քիթը մասամբ կանխորոշում է դեմքի գեղեցկությունն ընդհանրապես, վիրաբույժը պետք է նաեւ անթերի գեղագիտական եւ էսթետիկ ճաշակ ունենա, որպեսզի քիթն այնպես փոխի, որ այն համապատասխանի հիվանդի ընդհանուր դիմագծերին: Հակառակ դեպքում ռինոպլաստիկան իսկական աղետ կդառնա հիվանդի համար:

Ռինոպլաստիկա կատարում են փառասիրությունից ելնելով

Չնայած տարածված կարծիքին, թե պլաստիկ վիրաբույժի ծառայություններին դիմում են միայն արտաքին տեսքը բարելավելու համար, հաճախ պատահում է նաեւ, որ ռինոպլաստիկայի են դիմում նաեւ շնչառական համակարգի թերությունները շտկելու համար:

Միաժամանակ, հայտնի է, որ ռինոպլաստիկան հոգեբանական բարերար ազդեցություն է ունենում քթի տեսքից դժգոհ հիվանդների վրա: Վիրահատությունից հետո նրանք զգացմունքային փոփոխություններ են ունենում, ավելի ինքնավստահ են դառնում: Այդ տեսակետից ռինոպլաստիկան կարելի է դիտարկել ավելի շուտ որպես բուժիչ գործողություն, քան փառասիրության արտահայտություն: 

Ռինոպլաստիկան շատ ցավոտ է

Ի տարբերություն պլաստիկ այլ վիրահատությունների, օրինակ՝ կրծքի մեծացումը կամ լիպոսակցիան, ռինոպլաստիկայի մեջ առանձնակի ցավագին ոչինչ չկա: Վիրաբույժների մեծ մասը ռինոպլաստիկան անում են ընդհանուր անզգայացմամբ, այդ պատճառով վիրահատության ընթացքում հիվանդը ոչինչ չի զգում:

Վիրահատությունից հետո հիվանդները 7-10 օր քթի հատվածում որոշ անհարմարություն են զգում: Չեն բացառվում քթի եւ աչքերի շուրջ կապտուկները (հատկապես, եթե փոփոխվել է քթոսկրի ձեւը): Ամեն դեպքում, անմիջապես վիրահատությունից հետո ընդհանուր անհարմարությունը նվազագույն է:

Ռինոպլաստիկա ավելի լավ է կատարել գարնանը կամ աշնանը

Սա առասպել է: Ռինոպլաստիկա կարելի է կատարել տարվա ցանկացած եղանակի՝ անկախ կլիմայի պայմաններից: Բժշկի որոշ ցուցումներին հետեւելով՝ կկանխարգելեք եղանակային անբարենպաստ պայմանների հետ կապված բարդությունների առաջացումը: