NBC News․ Կարո՞ղ է Իլոն Մասկը կամուրջ դառնալ ԱՄՆ-ի և Չինաստանի միջև

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մինչ ամերիկացի միլիարդատեր Իլոն Մասկը զբաղված է ԱՄՆ կառավարության խոշոր կրճատումներով, քանի որ Թրամփի վարչակազմը կրճատում է դաշնային աշխատուժը, ընկերություններից մեկը, որի շնորհիվ նա կարողություն է ստեղծել, նոր բարձունքների  է հասել Չինաստանում, հայտնում է NBC News-ը։

Tesla էլեկտրական մեքենաներ արտադրող Մասկն այժմ երկու գործարան ունի Շանհայում։ «Մեգագործարանի»՝ Միացյալ Նահանգներից դուրս Tesla-ի առաջին արտադրական կենտրոնի, հետ մեկտեղ, 200 միլիոն դոլար արժողությամբ Megapack մարտկոցների արտադրության նոր գործարանը, որը բացվել է անցյալ ամիս, վճռորոշ նշանակություն ունի Չինաստանում և դրանից դուրս Մասկի հաջողության համար:

«Մեգագործարանը» արտադրում է աշխարհում յուրաքանչյուր 2 Tesla-ից 1-ը կամ տարեկան մոտ 1 միլիոն ավտոմեքենա: Բացի չինական շուկայի համար արտադրությունից, ընկերությունը մեքենաներ է արտահանում Եվրոպա և Ասիայի այլ մասեր, բայց դեռ ոչ ԱՄՆ, ընդգծում է լրատվամիջոցը։

Մասկի մեքենաները Չինաստանին օգնել են ստեղծել էլեկտրական մեքենաների արդյունաբերությունը, որն այժմ առաջատարն է աշխարհում: Դրա դիմաց Չինաստանը դարձավ Tesla-ի սպառման ամենամեծ շուկան ԱՄՆ-ից դուրս: «Չինաստանը կենտրոնական տեղ է զբաղեցնում ամբողջ աշխարհում Tesla-ի հաջողության պատմության մեջ, - ասել է վերլուծաբան Մայքլ Դանը՝ Սան Դիեգոյում գործող Dunne Insights խորհրդատվական ընկերության գործադիր տնօրենը:- Եթե նկատի չունենանք Չինաստանը, մենք բոլորովին այլ Tesla կունենանք»:

Հենց սա է խնդիրը, կարծում են ամերիկացի փորձագետները։

Կառավարության արդյունավետության բարձրացման գերատեսչությունում (DOGE) աշխատանքի շնորհիվ, Մասկը հսկայական ազդեցություն է ձեռք բերել ԱՄՆ կառավարության վրա՝ չնայած նրա ֆինանսական շահերի պահպանմանը Չինաստանում, որը ԱՄՆ-ն համարում է իր հիմնական ռազմավարական մրցակիցը:

Շնորհիվ Թրամփի խորհրդականի իր դերի և Չինաստանում ունեցած մեծ հեղինակության, որտեղ նա հանդիպել է բարձրաստիճան պաշտոնյաների, այդ թվում՝ արտաքին գործերի նախարարի հետ, Մասկը դիտվում է որպես հնարավոր կամուրջ աշխարհի երկու խոշորագույն տնտեսությունների միջև:

Սակայն անհասկանալի է մնում, թե ում շահերից է դա արվելու։

Բացի այդ, թեև Մասկը Չինաստանում հիացմունք է առաջացնում որպես նորարար և գործարար, սակայն նրա ճակատագիրը նույնպես կարող է արագ փոխվել, եթե ԱՄՆ-Չինաստան հարաբերությունները վատանան, և հասարակությունը սկսի նրան ավելի շատ կապել Թրամփի վարչակազմի քաղաքականության հետ, նշում է NBC News-ը։