Ինչո՞ւ Վրաստանը «կողմ» քվեարկեց Ուոլթերի և Մարկովիչի բանաձևերի ընդունմանը. մեկնաբանում է վրացագետը

Ինչպես հայտնի է, ԵԽԽՎ-ում Վրաստանի պատվիրակությունը «կողմ» է քվեարկել Ուոլթերի և Մարկովիչի բանաձևերի ընդունմանը:

Past.am-ը զրուցել է Վրաստանի հարցերով փորձագետ Ջոնի Մելիքյանի հետ՝ փորձելով ճշտել քվեարկության պատճառները: Մելիքյանն ընդգծեց, որ Ադրբեջանն ու Թուրքիան Վրաստանի ռազմավարական դաշնակիցներն են, տնտեսության մեջ բավականին լուրջ ներդրումներ ունեն, առևտրաշրջանառությունն անցնում է տարեկան 1մլրդ-ը:

«Այսօրվա դրությամբ Թբիլիսին չունի այլընտրանք, որպեսզի քվեարկի ուրիշ ձևով, բայց բոլոր պատգամավորները կարող էին նույն կերպ չքվեարկել, քանի որ ներկայացնում էին տարբեր կուսակցություններ. մեկը ԵԽԽՎ փոխնախագահն է՝ Թեդո Ջափարիձեն, որն իշխող կոալիցիայի ներկայացուցիչ է և պառլամենտի արտաքին հարաբերությունների կոմիտեի նախագահը, կա պատգամավոր Սաակաշվիլու կուսակցությունից, «Ազատ դեմոկրատներից» և այն:

Կարող էին այդ հարցում հավասարակշռություն պահպանել, բայց մենք գիտենք, որ այս վերջին տարիներին Հայաստանը տարբեր հարթակներում քվեարկում է իր ձևով, վրացական կողմը՝ իր ձևով: Հայաստանը շատ դեպքերում ռուսամետ քվեարկություն է անում, իսկ Թբիլիսիում դժգոհ են»,- նշեց մեր զրուցակիցը:

Հիշեցնենք, որ ԵԽԽՎ–ն հունվարի 26-ին քվեարկությամբ մերժել էր բրիտանացի պատգամավոր Ռոբերտ Ուոլթերի «Բռնության աճը Լեռնային Ղարաբաղում և Ադրբեջանի այլ գրավյալ տարածքներում» անվանումով զեկույցը, սակայն ընդունել էր բոսնիացի պատգամավոր Միլիցա Մարկովիչի «Ադրբեջանի սահմանամերձ շրջանների բնակիչները միտումնավոր զրկված են ջրից» անվանումով զեկույցը։

Լևոն Փանոսյան