Մարտի 3-ը Հայաստանի Հանրապետության կառավարության որոշմամբ նշվում է որպես գործարարի օր՝ ի պատիվ հայ մեծանուն գործարար ու բարեգործ Ալեքսանդր Մանթաշյանցի ծննդյան օրվա։
Կառավարության որոշումն ուժի մեջ է մտել 2017 թվականին Մանթաշյանցի 175-ամյակի առթիվ։ Ամեն տարի այս օրը «Մանթաշյանց» գործարարների ակումբի համահիմնադիրներն ու անդամները հարգանքի տուրք են մատուցում մեծն գործարարի հիշատակին՝ այցելելով և ծաղիկներ խոնարհելով Աբովյան փողոցում գտնվող Ալեքսանդր Մանթաշյանցի հուշարձանին։
«Մանթաշյանց» գործարարների ակումբի համահիմնադիր և նախագահ Վահրամ Միրաքյանն իր խոսքում նշեց, որ նախօրեին Թբիլիսիում են եղել, շրջել են գործարարի հետքերով, տեսել տունը, նրա կողմից կառուցված շենքերը։ Մի հատկանշական փաստ շեշտեց, թե ինչպես են վրացի գործարարները հպարտությամբ պատմել, որ Վրաստանի օպերայի շենքը Մանթաշյանցի ջանքերով է կառուցվել, որը համարվում է աշխարհի 10 լավագույն շենքերից մեկը։
Հպարտությամբ խոսելով և կրելով Մանթաշյանցի անունը՝ մանթաշյանականներն ասում են, որ իրենց նպատակն է հետևել մեծն գործարար Մանթաշյանցի օրինակին, ստեղծել նրա օրինակով օրինակելի գործարարի կերպար հայ հասարակության մեջ և որ գործարարի տոնը նշվի ոչ թե միությունների մակարդակով, այլ ավելի գլոբալ։
