«Երբեք չէի մտածի, որ Խորենի մայր եմ խաղալու, մենք գրեթե նույն տարիքի ենք». Մարջան Ավետիսյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ինչպես արդեն հայտնել էինք, մարտի 5-ից մեծ էկրան կբարձրանա «Վազգեն. Վերջին Սպարապետը» ֆիլմը, որը պատմում է Ազգային հերոս, Սպարապետ Վազգեն Սարգսյանի կյանքի մասին՝ հիմնված իրական փաստերի վրա:

«Ինձ շատ կարևոր կերպար էր բաժին հասել, որը կարևոր էր ոչ միայն Վազգեն Սարգսյանի ընտանիքի համար, այլև հայ ազգի, որովհետև իզուր չէ, որ ասում են՝ Գրետա մայրիկը բոլորի մայրիկն է։ Եթե Խորենին փրկում է նաև արտաքին նմանությունը Սպարապետին, որն ակնհայտ է, իմ դեպքում չափազանց դժվար էր, քանի որ ես ֆիզիկապես նման չեմ իմ կերպարին»,- անկեղծացավ դերասանուհի Մարջան Ավետիսյանը:

Նա նշեց, որ չափազանց բարդ ու պատասխանատու էր այս կերպարը, բայց հուսով է՝ այն հոգեկան ապրումները, որոնք ունեցել է կերպարը կերտելիս, կարողացել է փոխանցել՝ Գրետա մայրիկի սերն իր ընտանիքի, որդու և հայրենիքի հանդեպ:

Երբեք չէի մտածի, որ Խորենի մայր եմ խաղալու, մենք գրեթե նույն տարիքի ենք»,- նշեց Մարջան Ավետիսյանը:

Ֆիլմի սցենարի հեղինակ Լևոն Գալստյանի խոսքով՝ միջին և ավագ սերունդը հիշում է Վազգեն Սարգսյանին, երիտասարդները որոշակի պատկերացում ունեն այդ վառ անհատականության մասին, սակայն բոլոր սերունդներին էլ հայտնի չէ Վազգեն Սարգսյանի գրականությունը։

«Ուրախ եմ, որ ֆիլմը հնարավորություն կտա ծանոթանալու Վազգեն Սարգսյանի գրականության պատառիկներին, որոնք նրա էության մի մասն են և բացում են շատ հետաքրքիր շերտեր նրա աշխարհայացքի, մտածողության, հայրենիքի, կնոջ նկատմամբ վերաբերմունքի մասին»,- ասաց սցենարի հեղինակը:

Ֆիլմի տնօրեն Արմենուհի Ստեփանյանը ևս մեծ պատասխանատվությամբ է մոտեցել ֆիլմի ստեղծման ողջ ընթացքին: Եղել են բարդ փուլեր, անգամ անհաղթահարելի թվացող պահեր, բայց թիմի շնորհիվ ամեն խոչընդոտ հաղթահարել են:

«Սա պարզապես ֆիլմ չէ, այն բոլորիս սպարապետի մասին է, և դա շատ պարտավորեցնող էր։ Այն մեր պատմության, մեր արժեքների, մեր անցած ճանապարհի մասին է»,- նշեց ֆիլմի տնօրենը:

Ավելի վաղ հայտնել էինք նաև, որ Վազգեն Սարգսյանին մարմնավորող Խորեն Լևոնյանը ֆիլմի նկարահանումների ողջ ընթացքում ծանր ապրումներ է ունեցել:

«Մեծ դժվարությամբ փորձել եմ հաղթահարել, որովհետև նման կերպարներ հազար տարին մեկ անգամ են ծնվում: Փորձել եմ հասկանալ միքտը, հոգին, էությունը, ինչ տեսակ տղամարդ էր նա, ինչպես էր մտածում»,- նշել էր դերասանը:

Հիշեցնենք՝ «Վազգեն. Վերջին Սպարապետը» ֆիլմի պրեմիերան կկայանա Սպարապետի ծննդյան օրը՝ մարտի 5-ին՝ «Կինոմոսկվա»-ում: