Ուկրաինան Վաշինգտոնին է փոխանցել ընդերքի վերաբերյալ համաձայնագրի նոր առաջարկները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ուկրաինան ԱՄՆ-ին առաջարկել է կրճատել օգտակար հանածոների հիմնադրամը հինգ անգամ՝ այն հասցնելով 100 միլիարդ դոլարի։ Այս մասին հայտնում է Radio NV-ն՝ վկայակոչելով աղբյուրների։ 

Հրապարակման մեջ նշվում է, որ համաձայնագրի վերաբերյալ նոր առաջարկները ուկրաինական կողմը Վաշինգտոն է փոխանցել ԱՄՆ նախագահի ուկրաինական կարգավորման հարցով հատուկ բանագնաց Քիթ Քելոգի միջոցով։

Աղբյուրի համաձայն, Կիևն առաջարկում է փոքրացնել ապագա հիմնադրամի չափը, որին պետք է մուտքագրվեն օգտակար հանածոների արդյունահանումից ստացված եկամուտները, 500 միլիարդ դոլարից մինչև 100 միլիարդ դոլար:

Դարձյալ Քելոգի միջոցով ցանկություն է փոխանցվել հաջորդ շաբաթ Վաշինգտոնում Ուկրաինայի և Միացյալ Նահանգների նախագահների անձնական հանդիպման վերաբերյալ։ Կիևը ցանկանում է, որ պետությունների ղեկավարները շարունակեն անձամբ քննարկել համաձայնագրի բոլոր հնարավոր պայմանները։

Աղբյուրը հավելել է, որ Ուկրաինայի նախագահ Վլադիմիր Զելենսկին կասկածում էր, թե արդյոք պետք է ստորագրի ԱՄՆ-ի հետ համաձայնագիրը և հարցնում էր իր շրջապատի կարծիքը։

Նախօրեին հայտնի դարձավ, որ ԱՄՆ-ն Ուկրաինայի հետ ընդերքի վերաբերյալ ավելի խիստ համաձայնագրի նախագիծ է պատրաստել։  Ըստ The New York Times-ի՝ այն նախատեսում է, որ Կիևը բնական ռեսուրսների արդյունահանումից ստացած եկամուտների կեսը, ինչպես նաև նավահանգիստներից և այլ ենթակառուցվածքներից ստացած եկամուտները պետք է փոխանցի հատուկ հիմնադրամին, որն ամբողջությամբ վերահսկվելու է ԱՄՆ-ի կողմից։